हेलसिन्की विमानस्थलमा नयाँ अनुहार स्क्यानिङ प्रणाली, यात्रामा हुनेछ यस्तो परिवर्तन

हेलसिन्की-भान्ता विमानस्थलमा अक्टोबर १२ देखि ‘ईईएस’ (Entry/Exit System) नामक नयाँ सीमा नियन्त्रण प्रणाली सुरु गर्ने भएको छ। फिनल्यान्डले सीमा सुरक्षालाई थप सुदृढ बनाउन यो नयाँ प्रविधि प्रयोगमा ल्याउन लागेको हो।

यो प्रणाली विशेषगरी युरोपेली संघ र सेन्जेन क्षेत्र बाहिरका नागरिकहरूका लागि लक्षित छ, जसमा नेपाली नागरिकहरू पनि पर्दछन्।

यो नयाँ प्रणालीअन्तर्गत पहिलो पटक सेन्जेन क्षेत्रमा प्रवेश गर्दा यात्रुहरूको बायोमेट्रिक विवरण अर्थात् अनुहारको स्क्यान र औंठाछाप लिइनेछ। त्यसपछि सीमा अधिकारीले यात्रुको कागजात जाँच गर्नेछन्।

यो प्रक्रियापछि राहदानीमा भौतिक स्ट्याम्प लगाउने काम बन्द हुनेछ र सम्पूर्ण जानकारी डिजिटल रूपमा दर्ता हुनेछ।

फिनल्यान्डको गल्फ कोस्ट गार्डका हेलसिन्की सीमा जाँच विभागका प्रमुख पेट्री मेलिनका अनुसार यो प्रणालीले युरोपमा को-को छन् भन्नेबारे स्पष्ट जानकारी दिनेछ।

“कुनै व्यक्ति सेन्जेन क्षेत्रमा कहाँबाट प्रवेश गर्‍यो र कति समय बस्यो भन्ने हामीलाई थाहा हुनेछ,” उनले फिनल्यान्डको सार्वजनिक प्रसारण संस्था YLE सँग भनेका छन्।

पटक-पटक युरोप यात्रा गर्नेहरूका लागि यो प्रणालीले यात्रालाई सहज बनाउने अपेक्षा गरिएको छ। एक पटक बायोमेट्रिक विवरण दर्ता भइसकेपछि अर्को पटक यात्रा गर्दा यात्रुहरूले सेल्फ-सर्भिस मेसिन प्रयोग गरेर छिटो र सहज रूपमा फिनल्यान्ड छिर्न वा फिनल्यान्डबाट बाहिर जान सक्नेछन्।

अहिले सेन्जेन क्षेत्रभन्दा बाहिरबाट आएकाले वा उक्त क्षेत्रभन्दा बाहिर जानेले इमिग्रेसन डेस्कमा जानैपर्ने बाध्यता छ। अब एकपटक बायोमेट्रिक दिएपछि त्यसो गरिरहन पर्ने छैन।

यद्यपि यदि प्रणालीले कुनै प्रकारको शंकास्पद गतिविधि फेला पारेमा यात्रुलाई थप जाँचका लागि सीमा अधिकारीकहाँ पठाइनेछ।

हेलसिन्की-भान्ता विमानस्थलमा यात्रुहरूको सुविधाका लागि ६० वटा सेल्फ-सर्भिस मेसिनहरू जडान गरिनेछ। यो प्रणाली विमानस्थलमा मात्र नभई फिनल्यान्डका अन्य बाह्य सीमा नाकाहरूमा पनि क्रमशः लागू गरिने जनाइएको छ।

अधिकारीहरूका अनुसार यो प्रणालीले अन्तर्राष्ट्रिय अपराध नियन्त्रणमा पनि सहयोग पुर्‍याउनेछ। यो प्रणाली लागु भएपछि ईयूका सबै सदस्य राष्ट्रका सीमा, आप्रवासन र भिसा अधिकारीहरूले यात्रुहरूबारे भरपर्दो जानकारी पाउनेछन्।