न्यूयोर्क सहरले इतिहास रचेको छ। मंगलबार, नोभेम्बर ४ मा सम्पन्न निर्वाचनमा ३४ वर्षीय जोहरान मामदानी मेयरमा निर्वाचित भएका छन्।
उनी न्युयोर्कको इतिहासमा पहिलो मुस्लिम र पहिलो दक्षिण एसियाली मेयर बन्न सफल भएका छन्। मामदानीले सहरको महँगी र आवास संकटलाई आफ्नो मुख्य चुनावी एजेन्डा बनाएका थिए।
डेमोक्रेटिक सोसलिस्ट उम्मेदवार मामदानीले पूर्व गभर्नर एन्ड्रयु कुमो (स्वतन्त्र) र रिपब्लिकन कर्टिस सिल्वालाई पराजित गरे।
चुनावमा २० लाखभन्दा बढी मत खसेको थियो, जुन सन् १९६९ पछिको सबैभन्दा उच्च मतदान हो। मामदानीले ५० प्रतिशतभन्दा बढी मत ल्याएर जित सुनिश्चित गरेको प्रारम्भिक नतिजाहरूले देखाएका छन्।
मामदानीको जितमा दक्षिण एसियाली र मुस्लिम समुदायको ठूलो हात छ, जसलाई राजनीतिज्ञहरूले विरलै ध्यान दिने गर्थे। न्यूयोर्कको नेपाली समुदायको ठुलो हिस्साले पनि मामदानीलाई खुलेरै समर्थन गरेको थियो। बरू भारतका हिन्दु कट्टरपन्थीहरू उनको विरोधमा लागेका थिए।
अमेरिकाबाट प्रकाशित हुने नेपयोर्क अनलाइनले जनाए अनुसार मामदानीले हिन्दु मन्दिरहरू भ्रमण गरेका थिए र नेपाली समुदायसँग छलफल पनि गरेका थिए। उनले नेपाली भाषामा समेत न्यूयोर्क सहरका सेवाहरू उपलब्ध गराउन पहल गर्ने आश्वासन पनि दिएका थिए।
न्यूयोर्कमा बस्ने धेरै नेपालीले उनैलाई मत दिएको आकलन छ। अमेरिकामा नागरिकता लिएरै बस्ने नेपालीहरूको संख्या एक लाख नाघिसकेको छ।
उनले आफ्नो अभियान उर्दू, अरबी र बंगला लगायतका भाषामा पनि चलाएका थिए। उनले ५० भन्दा बढी मस्जिदको भ्रमण गरे र ट्याक्सी चालकहरू (जसमा धेरै दक्षिण एसियाली छन्) बीच पुगेका थिए। सन् २०२१ मा उनले यिनै ट्याक्सी चालकहरूको ऋण मिनाहाका लागि भोक हड्ताल गरेका थिए।
उनले घरभाडा स्थिर गर्ने, बस सेवा निःशुल्क बनाउने र युनिभर्सल चाइल्डकेयर (शिशु स्याहार) लागू गर्ने वाचा गरेका छन्।
महँगीको मुद्दा
उनको अभियान पूर्ण रूपमा ‘अफोर्डेबिलिटी’ अर्थात् किफायती जीवनयापनमा केन्द्रित थियो।
उनले घरभाडा स्थिर गर्ने, बस सेवा निःशुल्क बनाउने र युनिभर्सल चाइल्डकेयर (शिशु स्याहार) लागू गर्ने वाचा गरेका छन्। उनले हलाल फुड कार्टहरू र ज्याक्सन हाइट्सका कबाब किङ जस्ता रेस्टुरेन्टहरूलाई आफ्नो आर्थिक सन्देश फैलाउन प्रयोग गरेका थिए।
इस्लामोफोबियाको सामना
चुनावको दौडान मामदानीले चर्को इस्लामोफोबिया (इस्लामप्रतिको घृणा) को सामना गर्नुपर्यो।
प्रतिद्वन्द्वीहरूले उनीमाथि ‘इस्लामिक अतिवाद’ लाई बढावा दिएको जस्ता गम्भीर आरोप लगाएका थिए। पूर्व गभर्नर कुमोले मामदानीले अर्को ९/११ हमलालाई प्रोत्साहन गर्ने भन्दै ठट्टा गरेका थिए।
यसको जवाफमा मामदानीले सेप्टेम्बर ११ पछिको आफ्नो पीडादायी अनुभवबारे एक भावुक भाषण दिएका थिए। “हरेक मुस्लिमको सपना केवल अरू न्युयोर्कर सरह व्यवहार पाउनु हो,” उनले भने, “तर हामीलाई सधैँ थोरैमा चित्त बुझाउन भनियो। अब त्यस्तो हुँदैन।”
