हेलसिन्की चिडियाखानाका भालुको शीत निद्रा भङ्ग, कारण छ यस्तो

२५ र २० वर्षका दुई पोथी भालुहरू नोभेम्बरको दोस्रो हप्तामा शीतनिद्रामा गएका थिए। हिउँदको सुरुमा मौसम नरम भएकाले निद्रा बिचबिचमा टुटेको थियो, तर कडा जाडो सुरु भएपछि तिनीहरू शान्त भएका थिए।

चिडियाखानाका अनुसार तापक्रम भित्री कक्षमा पनि शून्यभन्दा तल झरेपछि दुवै भालुहरू अचम्मसँग एउटै गुँडमा सँगसँगै सुतेका थिए। भालुहरू सितिमिति त्यसो गर्दैनन्।

विगत दुई वर्षको नरम हिउँदले हेलसिन्कीका भालुहरूको शीतनिद्राको लय प्रभावित भएको छ। एकनासे निद्राको अवधि पहिलेको तुलनामा उल्लेखनीय रूपमा छोटो भएको छ।

जलवायु परिवर्तनले भालुहरूको शीतनिद्रालाई प्रभावित गरेको विज्ञहरू बताउँछन्। नरम हिउँद र अप्रत्याशित वातावरणीय घटनाहरूले तिनीहरूको प्राकृतिक लय छोटो र अस्थिर बनाइरहेका छन्।

हेलसिन्की चिडियाखानाका भालुको पनि यो हिउँदको सबैभन्दा लामो एकनासे निद्रा मात्र तीन हप्ता रह्यो।

चिडियाखानाका अनुसार शीतनिद्रापछि भालुहरूको भोक बिस्तारै फर्कँदै छ। कर्मचारीले तिनीहरूलाई सलाद, स्याउ र गाजर जस्ता हलुका खानेकुरा र अलिकति सुख्खा दाना दिइरहेका छन्।

भालुहरू बढी सक्रिय हुँदै जान थालेपछि तरकारीका साथमा अन्न, मासु र माछा पनि दिइनेछ।

हाल भालुहरू दैनिक रूपमा बाहिर निस्कन पाउँछन्। बाहिर निस्केर उनीहरू हिउँमा पल्टिन्छन्, रूखको खोडमा आफ्नो भुत्ला कन्याउँछन् र हिउँमुनिका गन्ध सुँघ्छन्।

चिडियाखानाका अनुसार निद्रा राम्रोसँग नपुगेका कारण तिनीहरू अझै थकित छन्। त्यसैले अझै गुँडमा आराम गर्दै बिताउँछन्।