.संक्षेपमा.
- बेरी कम्पनी कियान्तामाका सीईओलाई साढे ३ वर्ष जेल सजाय।
- थाई संयोजकलाई ३ वर्ष जेल, पीडितहरूलाई लाखौं युरो क्षतिपूर्ति तिर्नुपर्ने।
- फैसला जिल्ला अदालतका तीन न्यायाधीशको इजलासले गरेको हो।
फिनल्यान्डको ल्यापल्यान्ड जिल्ला अदालतले बेरी कम्पनीका दुईजना उच्च अधिकारीलाई गम्भीर मानव बेचबिखनको मुद्दामा दोषी ठहर गर्दै जेल सजाय सुनाएको छ।
अदालतले बेरी कम्पनी ‘कियान्तामा’ (Kiantama) का सीईओ भेर्नु भासुन्तालाई साढे ३ वर्षको र कम्पनीकी थाई संयोजक काल्याकोर्न फोङ्फिटलाई ३ वर्षको जेल सजाय सुनाएको हो।
सन् २०२२ मा थाईल्यान्डबाट बेरी टिप्न आएका कामदारहरूको चरम शोषण भए पछि उनीहरूविरूद्ध मुद्दा चलेको थियो।
अदालतको फैसलामा जनाइए अनुसार कामदारहरू फिनल्यान्ड आइपुग्नुअघि नै कम्पनीको ऋणमा डुबेका थिए। उनीहरूलाई हवाई टिकट, भिसा र खानाको लागि वास्तविकभन्दा धेरै शुल्क असुलिएको थियो।
अदालतले भासुन्ता र फोङ्फिटलाई पीडित कामदारहरूलाई भएको आर्थिक नोक्सानी र पीडाबापत ६ लाख युरोभन्दा बढी क्षतिपूर्ति तिर्न आदेश दिएको छ।
साथै दुवैले संयुक्त रूपमा पीडितहरूलाई थप २ लाख ७९ हजार युरो र प्रमाण संकलनमा लागेको ३० हजार युरो राज्यलाई तिर्नुपर्नेछ।
अदालतले दोषीलाई ६ लाख युरोभन्दा बढी क्षतिपूर्ति तिर्न आदेश दिएको छ।
कम्पनी ‘कियान्तामा’ लाई पनि १ लाख युरो जरिवाना तोकिएको छ। भासुन्तालाई उनको सैन्य पदबाट समेत हटाइएको छ भने दुवै प्रतिवादीले आफ्नो प्रतिरक्षामा लागेको कानुनी शुल्क पनि तिर्नुपर्नेछ।
यो फैसला जिल्ला अदालतका तीन न्यायाधीशको इजलासले गरेको हो। यद्यपि यो फैसला अन्तिम भने होइन। प्रतिवादीहरूले यस विरुद्ध पुनरावेदन गर्न सक्नेछन्। सीईओ भासुन्ताका वकिलले फैसलाविरुद्ध पुनरावेदन गर्ने सम्भावना रहेको बताएका छन्।
फिनल्यान्डमा हरेक वर्ष विभिन्न देशबाट हजारौं मौसमी कामदारहरू बेरी टिप्न आउने गर्दछन्। पछिल्लो समय नेपालबाट समेत मौसमी कामदारको रूपमा बेरी टिप्न आउने चलन बढेको छ।
