संक्षेपमा
- फिनिस वा स्वीडिस भाषा नजान्ने विदेशी विद्यार्थीलाई लक्षित नयाँ स्नातक कार्यक्रम।
- तीन वर्षको अवधिमा भाषा र बालशिक्षाको पढाइ सँगसँगै हुने।
- सन् २०२७ को शरद ऋतुदेखि २५ विद्यार्थीले अध्ययन सुरु गर्ने।
फिनल्यान्डमा नर्सिङ, सोसल वर्क लगायतका विषयहरू अङ्ग्रेजीमै पढ्न सकिने भए पनि बाल-शिक्षक अर्थात् डे-केयर शिक्षक बन्न मिल्ने डिग्री भने अङ्ग्रेजीमा पढ्न सकिने प्रावधान अहिलेसम्म थिएन। तर अब त्यो पनि सम्भव हुने भएको छ।
युभास्कुला विश्वविद्यालयले फिनल्यान्डमा फिनिस वा स्वीडिस भाषा नजान्नेहरूका लागि बालशिक्षक बन्ने नयाँ कार्यक्रम ल्याएको छ।
यो द्विभाषी स्नातक तहले विदेशी विद्यार्थीहरूलाई फिनल्यान्डको श्रम बजारमा स्थापित हुन र रोजगारी पाउन मद्दत गर्नेछ।
यो कार्यक्रम विशेष गरी फिनिस भाषामा दख्खल नभएकाहरूका लागि डिजाइन गरिएको विश्वविद्यालयले जनाएको छ। यसमा भाषाका लागि छुट्टै कक्षा नभई बालशिक्षाका विषयहरू पढ्दै भाषा सिक्ने व्यवस्था मिलाइएको हो।
विद्यार्थीहरूले ग्रुप वर्क र इन्टर्नसिपमार्फत व्यावहारिक रूपमा फिनिस भाषाको अभ्यास भने गर्नेछन्। कार्यक्रम निर्देशक पेप्पी तालासका अनुसार यसको मुख्य उद्देश्य विद्यार्थीलाई काममा चाहिने भाषा सिकाउनु हो।
स्नातक तह पूरा गरेपछि विद्यार्थीहरू बाल-शिक्षक अर्थात् डे-केयर शिक्षकको रूपमा काम गर्न योग्य हुनेछन्। तर प्रि-प्राइमरी (एसीकोउलु) मा पढाउनका लागि भने फिनिस भाषाको उच्च ज्ञान आवश्यक पर्नेछ।
शिक्षा मन्त्रालयले यो नयाँ कोर्स विकास गर्न ३ लाख युरो बजेट उपलब्ध गराएको छ। यसले फिनल्यान्डमा रहेको दक्ष शिक्षकहरूको अभाव कम गर्ने अपेक्षा गरिएको छ।
अहिले फिनल्यान्डमा योग्य डे-केयर शिक्षकहरूको निकै खाँचो छ। अन्तर्राष्ट्रिय विद्यार्थीलाई आकर्षित गरेर यो समस्या समाधान गर्ने विश्वविद्यालयको नयाँ योजना हो।
कार्यक्रमका लागि सन् २०२७ को सुरुवातमै आवेदन खुल्नेछ। पहिलो चरणमा २५ जना विद्यार्थीलाई मात्र भर्ना लिइने विश्वविद्यालयले जनाएको छ।
फिनल्यान्डको शिक्षा प्रणाली विश्वमै उत्कृष्ट मानिन्छ। यहाँ बालबालिकाहरूलाई सानैदेखि गुणस्तरीय शिक्षा दिने प्रचलन रहेका कारण दक्ष शिक्षकहरूको माग सधैं उच्च रहन्छ।
यो नयाँ कार्यक्रमले नेपाली जस्ता आप्रवासी समुदायका विद्यार्थीका लागि फिनल्यान्डमा स्थायी करिअर बनाउने राम्रो अवसर प्रदान गर्न सक्छ।
