रुससँग निकट सम्बन्ध रहेको एक ह्याकर समूहले फिनल्यान्डका विभिन्न सरकारी संस्थाहरूमाथि साइबर हमला गरेको छ।
‘नोनेम ०५७(१६)’ (NoName 057(16)) नामक उक्त समूहले रक्षा मन्त्रालय लगायतका वेबसाइटहरूलाई सोमबारदेखि लगातार चार दिनसम्म निशाना बनाएको हो।
फिनल्यान्डको साइबर सुरक्षा केन्द्रका अनुसार हमलाले छोटो अवधिका लागि सेवा अवरुद्ध गरे पनि कुनै स्थायी क्षति भने पुर्याएको छैन।
साइबर सुरक्षा केन्द्रका प्रमुख विशेषज्ञ युहानी इरोनेनले सोमबारदेखि नै फिनिस सरकारी वेबसाइटहरू समूहको सूचीमा रहेको पुष्टि गरे। उनका अनुसार हमला लगातार जारी छ।
इरोनेनका अनुसार यी आक्रमणहरू ‘डिनायल-अफ-सर्भिस’ प्रकृतिका हुन्, जसको उद्देश्य वेबसाइटहरूमा अत्यधिक ट्राफिक पठाएर सेवा अवरुद्ध गर्नु हो।
यो कुनै जटिल ह्याकिङ नभई धेरै स्रोतबाट इन्टरनेट ट्राफिक पठाएर वेबसाइटलाई व्यस्त बनाउने प्रविधि हो।
“जब आक्रमण रोकिन्छ, वेबसाइटहरू सामान्य रूपमा चल्न थाल्छन्,” इरोनेनले भने।
रक्षा मन्त्रालयका अतिरिक्त ह्याकरहरूले संसदका सबै प्रमुख दल, गृह मन्त्रालय, प्रधानमन्त्रीको कार्यालय र सर्वोच्च अदालतलाई पनि निशाना बनाएका छन्। समूहले फिनल्यान्डका विभिन्न कम्पनीहरूलाई पनि निशाना बनाउने चेतावनी दिएको छ।
केही समय अघि युरोपोल र फिनल्यान्डको राष्ट्रिय अनुसन्धान ब्युरोले यो समूहको पूर्वाधार ध्वस्त पारेको थियो, जसको बदलामा यी हमलाहरू भएको अनुमान गरिएको छ।
‘नोनेम ०५७(१६)’ समूह केही वर्षदेखि सक्रिय छ र यसले प्रायः प्रचार खोज्ने गर्छ। उनीहरूले टेलिग्राम जस्ता प्लेटफर्ममा आक्रमणको घोषणा गर्छन् र अन्य कार्यकर्ताहरूलाई सामेल हुन आह्वान गर्छन्।
विशेषज्ञ इरोनेनका अनुसार समूहले छनौट गर्ने समय र निशानाले उनीहरूको रुसी स्वार्थसँगको सम्बन्ध देखाउँछ।
केही समय अघि युरोपोल र फिनल्यान्डको राष्ट्रिय अनुसन्धान ब्युरोले यो समूहको पूर्वाधार ध्वस्त पारेको थियो, जसको बदलामा यी हमलाहरू भएको अनुमान गरिएको छ।
