जेनजीको तीन सर्त: वार्ता राष्ट्रपतिसँग, दलहरू अस्वीकार्य

नेपालमा हालैको राजनीतिक उथलपुथलको नेतृत्व गरिरहेको जेनजी समूहले सरकारसँग वार्तामा बस्नका लागि तीनवटा मुख्य सर्त अघि सारेको छ।

नेपाली सेनाका प्रधानसेनापति अशोकराज सिग्देलसँगको प्रारम्भिक चरणको छलफलमा उनीहरूले यी सर्तहरू राख्दै राजनीतिक दलहरूप्रति आफ्नो अविश्वास प्रकट गरेका हुन्।

मंगलबार राति सैनिक मुख्यालय भद्रकालीमा प्रधानसेनापति सिग्देलले जेनजीका विभिन्न समूहका प्रतिनिधिलाई बोलाएर छलफल गरेका थिए। सेनाले आन्दोलनकारीहरूको आधिकारिक वार्ता टोली पहिचान गर्ने प्रयास गरिरहेको बेला यो छलफल भएको हो।

छलफलमा सहभागी रक्षा बमका अनुसार जेनजी प्रतिनिधिले तीनवटा कुरा स्पष्ट पारेका छन्। उनीहरूले सेनाले केवल सहजकर्ताको भूमिका खेल्नुपर्ने र आफूहरूले सिधै राष्ट्रको अभिभावक अर्थात् राष्ट्रपतिसँग वार्ता गर्न चाहेको बताएका छन्।

त्यसैगरी, आन्दोलनका क्रममा सरकार पक्षबाट मारिएका नागरिकहरूको जिम्मा राज्यले लिनुपर्ने उनीहरूको दोस्रो माग छ। “जति पनि साथीहरू मारिनुभयो, उहाँहरूको जिम्मा राज्यले लिनुपर्छ,” बमले भनिन्।

उनीहरूको तेस्रो र सबैभन्दा महत्त्वपूर्ण सर्त भनेको वार्तामा कुनै पनि राजनीतिक दलका प्रतिनिधिलाई स्वीकार नगर्ने भन्ने हो।

राष्ट्रिय स्वतन्त्र पार्टी (रास्वपा) र राष्ट्रिय प्रजातन्त्र पार्टी (राप्रपा) लगायत कुनै पनि दललाई वार्तामा राखे आफूहरूलाई मान्य नहुने उनीहरूको अडान छ।

प्रधानसेनापति सिग्देलले भने सबै पक्षसँग संवाद गर्न र रास्वपा तथा राप्रपाजस्ता दलहरूको पनि सुझाव लिन जेनजी प्रतिनिधिलाई सल्लाह दिएका थिए। तर जेनजी प्रतिनिधिहरूले दलहरूसँग एउटै मञ्चमा नबस्ने अडान कायम राखेका थिए।

आधिकारिक वार्ता टोलीको नाम दिन जेनजीले तीन दिनको समय मागेको छ। देशका ७७ वटै जिल्लाका आफ्ना प्रतिनिधिसँग परामर्श गरेपछि मात्र टोलीको टुङ्गो लगाइने उनीहरूले बताएका छन्।

अहिले समुहको अनलाइन बैठक चलिरहेको छ, र उनीहरूले शुसीला कार्कीलाई आफ्नो प्रतिनिधी बनाउने प्रस्तावमा छलफल गरिरहेका छन्।