फिनल्यान्डको होल्लोलामा नाबालिगले स्कुल जलाए, प्रहरी अनुसन्धान जारी

फिनल्यान्डको राजधानी हेलसिन्कीबाट करिब १०० किलोमिटरको दुरीमा रहेको लाहति नजिकैको सहर होल्लोलास्थित कान्कान विद्यालयमा शनिबार र आइतबार बीचको रातमा भएको आगलागीले उक्त विद्यालय लगभग ध्वस्त भएको छ।

हामे प्रहरी विभागले एक विज्ञप्ति जारी गर्दै उक्त आगलागीलाई जानाजानी गराइएको (आगजनी) घटनाको रूपमा अनुसन्धान गरिरहेको जानकारी दिएको छ। प्रहरीका अनुसार कैयौं नाबालिग युवाहरू (१८ वर्ष नपुगेका) माथि संदिग्धको रूपमा अनुसन्धान भइरहेको छ।

प्रारम्भिक अनुसन्धानमा आगलागी हुनुभन्दा ठीक अघि घटनास्थल र त्यसको वरपर रहेका व्यक्तिहरूको पहिचान खुलेको प्रहरीले जनाएको छ। घटनामा संलग्न व्यक्तिहरू पैयात-ह्यामे (Päijät-Häme) क्षेत्रका नाबालिग युवाहरू रहेको र उनीहरूको संख्या धेरै रहेको प्रहरीको विज्ञप्तिमा उल्लेख छ।

प्रहरीले घटनास्थलको प्राविधिक अनुसन्धानलाई निरन्तरता दिँदै प्रमाणहरू संकलन गरेको छ। घटनाको यथार्थ विवरण, परिस्थिति र क्षतिको पूर्ण मूल्यांकन गर्नका लागि संलग्न व्यक्तिहरूसँग सोधपुछ र बयान लिने क्रम जारी रहेको प्रहरीले जनाएको छ।

प्रहरीले उक्त घटनाबारे सर्वसाधारणबाट धेरै सूचना र भिडियोहरू प्राप्त गरेको बताएको छ। प्राप्त भिडियोहरूको मद्दतले प्रहरीले आगोको चरण र त्यसको सुरुवातको कारण पत्ता लगाउन सफल भएको उल्लेख गरेको छ।

घटनाबारे अझै कुनै जानकारी भए इमेल vihjeet.hame(at)poliisi.fi वा फोन नम्बर 0295 414 222 मा सम्पर्क गर्न प्रहरीले अनुरोध गरेको छ।