संक्षेपमा
- फिनल्यान्डका राष्ट्रपतिद्वारा ५ लाख ४० हजार युरो व्यक्तिगत दान।
- इटलीमा प्राध्यापक रहँदाको कमाई सामाजिक कार्यमा खर्च।
- युवाहरूको कला, खेलकुद र साक्षरतामा लगानी हुने।
फिनल्यान्डका राष्ट्रपति अलेक्जेन्डर स्टबले क्रिसमसको पूर्वसन्ध्यामा ५ लाख ४० हजार युरो दान गरेका छन्। यो रकम उनले व्यक्तिगत रूपमा तीन छुट्टाछुट्टै सामाजिक क्षेत्रमा काम गर्ने संस्थामा वितरण गरेका हुन्।
राष्ट्रपति कार्यालयका अनुसार यो रकम उनले इटलीको फ्लोरेन्समा प्राध्यापकका रूपमा काम गर्दा प्राप्त गरेको प्रवचन शुल्क (स्पिकर फी) बाट सङ्कलन गरेका हुन्।
उनले युरोपियन युनिभर्सिटी इन्स्टिच्युट (EUI) मा रहँदा विभिन्न कार्यक्रमहरूमा प्रवचन दिएबापत यो पारिश्रमिक पाएका थिए।
कुल रकममध्ये २ लाख ५० हजार युरो फिनिस कल्चरल फाउन्डेसन लाई दिइएको छ। उक्त फाउन्डेसनमा राष्ट्रपति र उनकी पत्नी सुजान इनेस-स्टबको नाममा एउटा विशेष कोष स्थापना गरिनेछ। कोषले युवाहरूको कला, विज्ञान र संस्कृतिको प्रवर्द्धनमा सहयोग गर्नेछ।
राष्ट्रपति स्टबले अर्को २ लाख ५० हजार युरो लापीमुर्तो फाउन्डेसनलाई प्रदान गरेका छन्। यो संस्थाले युवा खेलाडीहरूलाई अन्तर्राष्ट्रिय स्तरमा पुग्न र बालबालिकाको खेलकुद विकास गर्न सहयोग गर्छ।
बाँकी ४० हजार युरो मी फाउन्डेसनलाई प्रदान गरिएको छ। उक्त फाउन्डेसनले बालबालिका र युवाहरूको साक्षरता र पढ्ने सीप विकासका क्षेत्रमा काम गर्छ।
राष्ट्रपति कार्यालयका अनुसार यो रकम उनले इटलीको फ्लोरेन्समा प्राध्यापकका रूपमा काम गर्दा प्राप्त गरेको प्रवचन शुल्क (स्पिकर फी) बाट सङ्कलन गरेका हुन्।
को हुन् अलेक्जेन्डर स्टब?
अलेक्जेन्डर स्टब फिनल्यान्डका १३ औं राष्ट्रपति हुन्। उनले १ मार्च २०२४ मा राष्ट्रपतिको पदभार सम्हालेका हुन्।
उनको जन्म १ अप्रिल १९६८ मा हेलसिन्कीमा भएको हो। उनी फिनिस र स्विडिस दुबै भाषा बोल्ने परिवारमा हुर्केका हुन्।
उनले लन्डन स्कुल अफ इकोनोमिक्सबाट अन्तर्राष्ट्रिय सम्बन्धमा विद्यावारिधि (PhD) गरेका छन्। यसबाहेक उनले अमेरिका र फ्रान्सका विभिन्न विश्वविद्यालयमा पनि अध्ययन गरेका छन्।
राष्ट्रपति हुनुअघि उनले फिनल्यान्डको प्रधानमन्त्री, अर्थमन्त्री र परराष्ट्रमन्त्रीका रूपमा काम गरिसकेका छन्। उनी युरोपेली राजनीतिमा पनि लामो अनुभव भएका प्रभावशाली नेता मानिन्छन्।
उनको परिवारमा पत्नी सुजान इनेस-स्टब र दुई सन्तान छन्। उनी खेलकुदमा निकै रुचि राख्छन् र आफैं पनि एक सक्रिय एथलिट हुन्।
