.संक्षेपमा.
- फिनल्याण्डको दूतावास र जनकपुरका मिथिला कलाकारहरूबीच कला सहकार्य।
- दूतावासको पर्खालमा कोरिएको कलाले मिथिला संस्कृति, महिला सशक्तिकरण र नेपाल-फिनल्याण्ड साझेदारीलाई दर्शाउने।
- ग्रामीण र आर्थिक रूपमा पिछडिएका महिला कलाकारहरूको लागि आयआर्जन र स्वतन्त्रताको महत्त्वपूर्ण माध्यम।
काठमाडौंस्थित फिनल्याण्डको दूतावासले जनकपुरका मिथिला कलाकारहरूसँगको सहकार्यमा आफ्नो पर्खाललाई जीवन्त कलाकृतिमा रूपान्तरण गरिरहेको छ। विशालनगरस्थित दूतावासको पर्खालमा जनकपुरका कलाकारहरूले मिथिला कलाको परम्परा अनुसार विविध रंग र कथाहरू समेटेर भित्तेचित्र निर्माण गरिरहेका छन्।
दूतावासले सामाजिक सञ्जालमार्फत यस परियोजनाको प्रगतिबारे जानकारी दिँदै कलाकृतिले नयाँ रौनकता थपिरहेको र कलाकारहरूले मिथिला कलाको समृद्ध परम्परालाई विशालनगरमा ल्याएकोमा उत्साह व्यक्त गरेको छ।
“हाम्रो पर्खाल बलियो रंग र शक्तिशाली कथाहरूसँगै जीवित हुँदैछ! कलाकृति राम्ररी अघि बढिरहेको छ, र यसले छिमेकलाई कसरी आकार दिन्छ भन्ने हेर्न हामी उत्सुक छौं,” दूतावासले सामाजिक सञ्जालमार्फत जानकारी दिएको छ।
दूतावासका अनुसार यी महिला कलाकारहरूका लागि मिथिला कला सांस्कृतिक सम्पदा र परम्पराको धरोहर मात्र नभई महत्वपूर्ण आयस्रोत र स्वतन्त्रताको माध्यम पनि हो। ग्रामीण र आर्थिक रूपमा विपन्न पृष्ठभूमिबाट आएका, सीमित शैक्षिक र जीविकोपार्जनका अवसरहरू भएका धेरै महिलाहरूले मिथिला कलामार्फत आफ्नो समुदायलाई नै माथि उठाइरहेका छन्।
विशेष रूपमा तयार पारिने यो कलाकृतिले फिनल्याण्ड र नेपालबीचको साझेदारीलाई पनि प्रतिबिम्बित गर्ने बताइएको छ। दूतावासले कला निर्माणको प्रगतिलाई सामाजिक सञ्जालमार्फत पछ्याउन सबैलाई आग्रह गरेको छ।
जनकपुरका मिथिला कलाकारहरूलाई दूतावासको सँगको सहकार्यमा जोड्ने काम जनकपुर क्षेत्रमा महिला सशक्तीकरण र मिथिला कलाको क्षेत्रमा लामो समय देखि काम गरेको जनकपुर महिला विकास केन्द्र (Janakpur Women’s Development Center) ले गरेको हो।
यो परियोजनाका अधिकांश कलाकारहरू ग्रामीण र आर्थिक रूपमा पिछडिएका पृष्ठभूमिबाट आएका छन्।
यो परियोजनाका अधिकांश कलाकारहरू ग्रामीण र आर्थिक रूपमा पिछडिएका पृष्ठभूमिबाट आएका छन्, जहाँ शिक्षा र जीविकोपार्जनका अवसरहरू सीमित छन्। मिथिला कलाको माध्यमबाट यी महिलाहरूले पूरै समुदायलाई माथि उठाउने काम गरिरहेको दुतावासले जनाएको छ।
