आज घटस्थापना, यस्तो छ फिनल्यान्ड बस्ने नेपालीको दसैं तयारी

नेपालीहरूको महान चाड बडादसैं आजबाट सुरु भएको छ। आश्विन शुक्ल प्रतिपदाको पहिलो दिन आज घर–घरमा वैदिक विधिपूर्वक दियो, कलश र गणेश स्थापना गरी घटस्थापना गरिएको छ।

फिनल्यान्डमा बस्ने नेपालीहरूले पनि आफ्नो परम्परा र संस्कृतिलाई निरन्तरता दिँदै दसैं मनाउन सुरु गरेका छन्।

नेपालमा जस्तै यहाँ पनि जौको जमरा राखेर दसैंको सुरुवात गरिन्छ। दुर्गा देवीको प्रिय वस्तु मानिने जौको अंकुरलाई विजया दशमीको दिन टीका प्रसादसँगै समृद्धिको प्रतीकको रूपमा ग्रहण गरिन्छ।

यस वर्षको दशैंको टीका असोज १६ गते, अर्थात् अक्टोबर २ तारिखमा परेको छ।

यस्तो छ फिनल्यान्ड बस्ने नेपालीको दसैं तयारी

फिनल्यान्डमा रहेका नेपालीहरूको दसैं मनाउने तरिका भने मिश्रित देखिन्छ।

“हरेक वर्ष जस्तै यो वर्ष पनि परिवार र साथीभाइसँगै दसैं मनाउने हो। कामबाट एक दिनको बिदा मिलाएको छु, त्यसैले खासै नयाँ योजना छैन।” लामो समयदेखि हेलसिन्कीमा बस्दै आएका एक नेपालीले नेपालीलाइनेनलाई भने।

नेपालीलाइनेनले कुरा गरेका अर्का एक युवाले साथीभाइ मिलेर खसी ल्याउने, तास खेल्ने र रमाइलो गर्ने योजनामा रहेको बताए।

“साथीहरू मिलेर काटेको खसी सिङ्गै किनेर ल्याउने, तास खेल्ने, र सामुहिक टिका लगाउने तयारी छ।” उनले भने। “नेपालको पछिल्लो राजनीतिक घटनाक्रमले मन खल्लो भए पनि दसैंको रमाइलोलाई निरन्तरता दिने योजना छ।”

यसै वर्ष नेपालबाट आएकाहरूका लागि भने यो विदेशको पहिलो दसैं हो।

हेलसिन्कीको एक दक्षिण एसियाली पसलमा किनमेलका क्रममा भेटिएका एक नवआगन्तुकले दसैंको मुखमै विदेसिन पर्दा खल्लो लागेको बताए।

“विदेशको पहिलो दसैं अलि अनौठो महसुस हुँदो रहेछ। काम पाएको छैन, पैसा पनि खासै छैन र धेरै मानिसहरूसँग चिनजान पनि छैन।” उनले भने। “त्यसैले सामान्य रूपमा घरमै मनाइन्छ होला। स्टुडेन्ट हाउजिङमा केही नेपालीहरू हुनुहुन्छ, उहाँहरूसँगै मिलेर मनाउने विचार छ।”

दशैंको आगमनसँगै हेलसिन्की क्षेत्रका नेपाली र अन्य दक्षिण एसियाली पसलहरूमा पनि चहलपहल बढेको छ। यी पसलहरूले ग्राहकहरूलाई जमराको लागि जौ निःशुल्क उपलब्ध गराउने गरेका छन्। जौ लिन जाने ग्राहकले मिठाई, चामल र मासु जस्ता अन्य सामानहरू पनि किन्ने हुँदा दसैंको समयमा उनीहरूको व्यापार पनि बढ्ने गरेको छ।