फिनल्यान्डको जनसंख्या वृद्धि चार शहरी क्षेत्रमा केन्द्रित, अन्य क्षेत्रहरू जनशून्य बन्दै

फिनल्यान्डको जनसंख्या विकासको नयाँ तथ्यांकले देशको अधिकांश भूभाग जनशून्य हुँदै गएको देखाएको छ। तुर्कु शहरका रणनीतिक निर्देशक डा. टिमो आरोले केहि दिन अगाडि सार्वजनिक गरेको एक नक्सामा देशको अधिकतम भाग रातो रंगमा देखाइएको छ, जसको अर्थ फिनल्याण्डका अधिकांश भागमा जनसंख्या घट्दो क्रममा रहेको छ भन्ने हो।

फिनल्याण्डको तंथ्याङ्क विभागका अनुसार एस्पो, भान्ता, सिपो, केम्पेले, लुओटो, पिर्क्काला, ताम्पेरे, यार्भेनपा, लेम्पाला र कारिना जस्ता शहरहरूमा सबैभन्दा बढी जनसंख्या वृद्धि भएको छ। यी शहरहरू मुख्यतया चार ठूला शहरी क्षेत्रहरूको वरिपरि अवस्थित छन्।

डा. आरोका अनुसार देशका चार प्रमुख शहरी क्षेत्रहरू – हेलसिन्की, ताम्पेरे, तुर्कु र औलुमा पछिल्लो १५ वर्षमा करिब ४ लाख जनसंख्या थपिएको छ। यो तथ्यांकले फिनल्यान्डमा शहरीकरणको प्रवृत्ति तीव्र गतिमा बढिरहेको देखाउँछ।

फिनल्यान्डमा सहरीकरण तीव्र गतिमा बढिरहेको छ भने केही क्षेत्रहरू पुरै खाली हुँदै गइरहेका छन्।

फिनल्यान्डको जनसंख्या विकासको यो प्रवृत्तिले देशको भविष्यमा ठूलो चुनौती सिर्जना गर्ने विज्ञहरूको दाबी छ। एकातिर शहरी क्षेत्रमा जनघनत्व बढ्दै जानेछ भने अर्कोतिर ग्रामीण क्षेत्रहरू भने क्रमशः जनशून्य हुँदै जाने देखिएका छन्।