यो प्रिमियम सामाग्री हाम्रा सहयोगी सदस्यका लागि मात्र।
नेपालीलाइनेनमा प्रकाशित यो सामाग्री 'प्रिमियम' हो। यदि हाम्रो 'सहयोगी सदस्य' बनिसक्नु भएको छ भने गुगल एकाउन्ट वा इमेल प्रयोग गरी लगिन गर्नुहोस्।
'सहयोगी सदस्य' बनिसक्नुभएको छैन भने प्रिमियम सामाग्रीहरु पढ्न 'सहयोगी सदस्य' बन्नुहोस्। सदस्यता दस्तुर मासिक ४.९१ युरो, वार्षिक ५९ युरो।
(प्रिय पाठक, यो नेपालीलाइनेनका सहयोगी सदस्यहरूले मात्र पढ्न मिल्ने ‘प्रिमियम स्टोरी’ हो। ‘सहयोगी सदस्य’ बनी हामीलाई सघाउनु भएकोमा धेरै-धेरै धन्यवाद।)
संक्षेपमा
- नसामा रहेकी महिलालाई ट्याक्सी चालकले घरको साटो एस्पोस्थित साथीको कोठामा लगे।
- बलात्कारको आरोपमा ३५ वर्षीय स्माइल मोहम्मद जेलेलाई दुई वर्षको जेल सजाय।
- अभियुक्तले अस्वीकार गरे पनि डीएनए परीक्षणबाट अपराध पुष्टि भएको अदालतको ठहर।
ट्याक्सी चढेर घर जान हिँडेकी एक महिलालाई चालकले आफ्नो साथीको कोठामा पुर्याएपछि भएको बलात्कार काण्डमा हेलसिन्कीस्थित पुनरावेदन अदालतले ३५ वर्षीय पुरुषलाई दोषी ठहर गरेको छ।
घटना सन् २०२० को सेप्टेम्बरमा भएको थियो, जसमा पीडित महिला अत्यधिक मदिराको नसामा थिइन्।
घटनाको रात ती महिला हेलसिन्कीको Katajanokka बाट ट्याक्सी चढेकी थिइन्। अत्यधिक नसामा रहेकी उनलाई चालकले सिधै एस्पोस्थित आफ्नो साथीको कोठामा लगेका थिए।
चालकले आफ्ना साथीलाई आफू थकित भएको भन्दै सुत्न आउन लागेको सन्देश पठाएका थिए, तर महिलाबारे केही बताएका थिएनन्।
महिलाको ठेगाना पत्ता लगाउन नसकेको भन्दै चालकले उनलाई साथीको कोठामा छोडेर आफू पनि त्यहीँ सुतेका थिए।
बिहान ब्युँझिदा महिलाले सोफामा आफ्नो कपडा खोलिएको अवस्थामा आफूलाई पाएको बताएकी थिइन्। उनले शरीरको तल्लो भागमा दुखाइ महसुस गरेको पनि अदालतमा बताएकी थिइन्।
उनले आफ्नो स्मरणमा धेरै कुराहरू नभएको पनि बताएकी थिइन्।
त्यहाँ चालकका साथी अर्थात् घरधनी स्माइल मोहम्मद जेले पनि थिए। ती महिलाका लागि बिल्कुलै नौलो व्यक्ति थिए।
अत्तालिएकी महिलाले के भयो भनी सोध्दा ती पुरुषले जवाफ दिनुको साटो उल्टै गिज्याएका थिए। फोनको ब्याट्री सकिएपछि महिलाले ती पुरुषलाई आफ्नो घर नजिकै पुर्याइदिन आग्रह गरेकी थिइन्।
घटनाकै दिन महिलाले स्वास्थ्य जाँच गराएकी थिइन्। उक्त परिक्षणमा उनको शरीर र भित्री वस्त्रमा ती पुरुषको डीएनए फेला परेको थियो।
फिनल्यान्डको कानुन अनुसार यदि कोही व्यक्ति नसामा, निदाएको वा प्रतिरोध गर्न नसक्ने अवस्थामा छ भने त्यस्तो अवस्थाको फाइदा उठाएर गरिने यौनजन्य कार्यलाई बलात्कार मानिन्छ।
अभियुक्तले गरेका थिए आरोप अस्विकार
अदालतमा अभियुक्तले बलात्कारको आरोप अस्वीकार गर्दै सहमतिमा सामान्य ‘लसपस’ मात्र भएको दाबी गरेका थिए।
तर पश्चिम-उसिमा जिल्ला अदालतले सन् २०२४ को अक्टोबरमा प्रमाणका आधारमा उनलाई दोषी ठहर गरेको थियो।
अदालतले स्माइल मोहम्मद जेलेलाई दुई वर्षको कडा कारावास र पीडितलाई ४,००० युरो क्षतिपूर्ति तिर्न आदेश दिएको थियो।
अभियुक्तले सजाय घटाउन माग गर्दै पुनरावेदन गरेका थिए। अहिले माथिल्लो अदालतले जिल्ला अदालतको फैसलालाई नै सदर गरेको हो।
फिनल्यान्डको कानुन अनुसार यदि कोही व्यक्ति नसामा, निदाएको वा प्रतिरोध गर्न नसक्ने अवस्थामा छ भने त्यस्तो अवस्थाको फाइदा उठाएर गरिने यौनजन्य कार्यलाई बलात्कार मानिन्छ।
साथै यहाँको कानुनी प्रणालीमा डीएनए प्रमाणलाई निकै बलियो मानिन्छ।
ट्याक्सी चढ्दा सुरक्षाको हिसाबले फिनल्यान्ड सुरक्षित मानिए पनि रातीको समयमा यात्रा गर्दा आफ्नो लोकेसन साथीभाइ वा परिवारलाई सेयर गर्नु बुद्धिमानी हुन्छ।
पछिल्लो समय फिनल्यान्डमा ट्याक्सी चालकहरू यस्ता घटनामा मुछिएका केसहरू धेरै आइरहेका छन्।
यस्तै कारण देखाउँदै एस्पोमा त एउटा महिला र बालबालिकाका लागि मात्र भनेर महिलाले नै चलाउने छुट्टै ट्याक्सी कम्पनी समेत सञ्चालनमा आएको छ।
