.संक्षेपमा.
- फिनिस सीमा सुरक्षा बलद्वारा कम्तीमा तीन जना पक्राउ।
- पक्राउ पर्नेमा कम्पनीका मुख्य सञ्चालक पनि सामेल।
- अभियुक्तहरूमाथि गम्भीर गैरकानुनी आप्रवासन गराएको अभियोग।
फिनल्यान्डमा दर्जनौं नेपालीहरूलाई श्रम शोषण र ठगीको शिकार बनाएको भनिएको प्रकरणमा कम्तीमा तीन जना पक्राउ परेका छन्। पक्राउ पर्नेमा उक्त कम्पनीका मुख्य सञ्चालक पनि रहेको जानकारी नेपालीलाइनेनले प्राप्त गरेको छ।
फिनिस सीमा सुरक्षा बलले अनुसन्धान गरिरहेको यो मुद्दामा पक्राउ परेकाहरूमाथि गम्भीर गैरकानुनी आप्रवासनको व्यवस्था मिलाउन सहभागी भएको अभियोग लगाइएको छ।
नेपालीलाइनेनले प्राप्त गरेको अदालतको कागजात अनुसार करिब एक हप्ताअघि कम्पनीका मुख्य मालिक र अर्का एक व्यक्तिलाई काइनु जिल्ला अदालतमा पेश गरिएको थियो।
अदालतमा मुख्य मालिकको थुना लम्ब्याउन र अर्का नयाँ व्यक्तिलाई पक्राउ गर्न अनुमति मागिएको थियो।
पहिले पक्राउ परेका भनिएका नेपाली व्यक्ति भने पछिल्लो पटक अदालतमा पेश गरिएका दुई जनामा समावेश छैनन्।
के-हो घटना?
करिब चार दर्जन नेपालीहरू फिनल्यान्डमा गम्भीर ठगी र श्रम शोषणको शिकार भएको जानकारी प्राप्त गरेपछि नेपालीलाइनेनले हिजो त्यसबारे समाचार बनाएको थियो।
पीडितहरूका अनुसार एक आपराधिक सञ्जालले उनीहरूलाई रोजगारीको वाचामा फिनल्यान्ड ल्याएको थियो तर काम वा तलब बिना अलपत्र पारेको थियो।
पीडित ४३ जनामध्ये ३९ जनालाई ‘सिजनल भिसा’मा जङ्गलको कामको लागि ल्याइएको थियो। उनीहरूलाई राजधानी हेलसिन्कीबाट करिब ६०० किलोमिटर टाढा रहेको कायानी, काइनु र सोत्कामो क्षेत्रमा काम दिने भनिएको थियो।
स्रोतका अनुसार पीडितहरूको संख्या यो भन्दा ठूलो छ र यसमा अन्य देशका नागरिकहरू पनि छन्।
नेपालीलाइनेनलाई ४३जना पीडितका बारे जानकारी प्राप्त भएपनि एक स्रोतका अनुसार पीडितहरूको संख्या यो भन्दा ठूलो छ र यसमा अन्य देशका नागरिकहरू पनि छन्।
फिनल्यान्डमा यसअघि पनि नेपालीहरू ठगीमा परेका भए पनि यति ठूलो संख्यामा पीडित भएको यो पहिलो घटना मानिएको छ।
गत मे महिनामा पनि नेपालीलाइनेनले फिनल्यान्डको वन क्षेत्रमा नेपाली लगायतका कामदारहरूको शोषण भएको विषयमा समाचार प्रकाशन गरेको थियो।
