फिनल्यान्डका कम्पनीहरूमा अन्तर्राष्ट्रिय दक्ष जनशक्ति राख्ने क्रम बढेको देखिएको छ। विशेषगरी सूचना तथा सञ्चार (आईटी), होटल तथा रेस्टुरेन्ट, र सार्वजनिक क्षेत्रमा विदेशी कामदारको उपस्थिति बलियो बन्दै गएको छ।
बारोनाको ‘अन्तर्राष्ट्रिय जनशक्ति र भविष्य २०२५’ सर्वेक्षणका अनुसार गत वर्षको तुलनामा निर्माण क्षेत्रमा विदेशीलाई रोजगारी दिने कम्पनीहरूको सङ्ख्या सबैभन्दा धेरै बढेको छ।
आईटी क्षेत्रका लगभग तीनमध्ये दुई (६४ प्रतिशत) कम्पनीले अन्तर्राष्ट्रिय जनशक्तिलाई रोजगारी दिएका छन्।
होटल तथा रेस्टुरेन्ट क्षेत्रमा यो हिस्सा ५९ प्रतिशत र सार्वजनिक क्षेत्रमा ५० प्रतिशत रहेको छ।
विदेशी कामदारलाई रोजगारी दिनेमा सबैभन्दा ठूलो वृद्धि निर्माण क्षेत्रमा देखिएको छ। गत वर्षको तुलनामा यस क्षेत्रमा २४ प्रतिशत अङ्कले वृद्धि भएको छ। हाल निर्माण क्षेत्रका ४९ प्रतिशत कम्पनीहरूले अन्तर्राष्ट्रिय जनशक्तिलाई काममा लगाएका छन्।
क्षेत्रीय रूपमा सबैभन्दा धेरै विदेशी कामदारहरू उत्तरी फिनल्यान्ड र हेलसिन्की-उसिमा क्षेत्रमा कार्यरत छन्।
आवश्यकता र चुनौतीहरू
पछिल्लो समय समग्रमा जनशक्ति अभाव केही कम भए पनि केही क्षेत्रमा अझै अभाव छ। होटल तथा रेस्टुरेन्ट, निर्माण र वैज्ञानिक-प्राविधिक क्षेत्रमा अझै कामदारको अभाव छ।
सर्वेक्षणले आगामी वर्ष विशेषगरी निर्माण र उद्योग क्षेत्रमा जनशक्तिको आवश्यकता बढ्ने देखाएको छ।
यसैबीच अन्तर्राष्ट्रिय भर्ना प्रक्रिया झन्झटिलो बन्दै गएकोमा भने सूचना प्रविधि र सार्वजनिक क्षेत्रका रोजगारदाताहरू चिन्तित देखिएका छन्।
कानुनी प्रक्रिया र भिसा अनुमति सम्बन्धी चुनौतीहरू पनि सार्वजनिक र वित्त क्षेत्रमा बाधक देखिएका छन्।
प्रमुख समस्याः भाषा र अनुमति
रोजगारदाताहरूका अनुसार विदेशीलाई काममा राख्न भाषागत चुनौती प्रमुख बाधा हो। यो समस्या विशेषगरी वित्त, बीमा र सार्वजनिक क्षेत्रमा बढी छ।
त्यसैगरी कानुनी प्रक्रिया र भिसा अनुमति सम्बन्धी चुनौतीहरू पनि सार्वजनिक र वित्त क्षेत्रमा बाधक देखिएका छन्।
बारोनाकी निर्देशक एलिना सान्तालाह्तीका अनुसार सार्वजनिक क्षेत्रमा अझै पनि हरेक दुई मध्ये एक संस्थामा विदेशी कामदार छन्। सेवानिवृत्तिका कारण यो सङ्ख्या आगामी वर्षहरूमा बढ्ने निश्चित छ।
यो सर्वेक्षणमा ‘अन्तर्राष्ट्रिय जनशक्ति’ भन्नाले विदेशी कामदार र फिनल्यान्डमा बस्ने तर फिनिस भाषामा पोख्त नभएका विदेशी पृष्ठभूमिका व्यक्तिहरूलाई जनाउँछ।
यो सर्वेक्षण बारोनाका लागि Taloustutkimus ले गरेको हो। यसमा करिब ५०० रोजगारदाताहरूको धारणा सङ्कलन गरिएको थियो।
