संक्षेपमा
- मार्च ४ राती १२ बजेसम्म आवेदन दिनुपर्ने।
- भान्ताका बेरोजगार नागरिकका लागि नि:शुल्क तालिम।
- प्रशिक्षणको भाषा फिनिस।
फिनल्यान्डको भान्ता सहरमा आफ्नै रेस्टुरेन्ट खोल्ने सपना देख्नेहरूका लागि छोटो अवधिको तालिम सञ्चालन हुने भएको छ।
भान्ताको व्यावसायिक कलेज भारियाले उक्त तालिम सञ्चालन गर्ने भएको हो।
तालिमले नयाँ उद्यमीहरूलाई व्यवसायको व्यावहारिक पक्ष, आर्थिक व्यवस्थापन र ग्राहक खोज्ने तरिकाबारे प्रशिक्षण दिनेछ।
तालिम मार्च ३० देखि सुरु हुनेछ भने १७ अप्रिलमा सकिनेछ। इच्छुक व्यक्तिले Opintopolku वेबसाइटमार्फत मार्च ४ सम्म आवेदन दिन सक्नेछन्।
भारियाकी ग्राहक व्यवस्थापक इङ्का आभेरिनका अनुसार यो तालिम व्यवसायिक सोच भएकाहरूका लागि उपयोगी छ। तालिममा कम्पनीको वित्त व्यवस्थापन र दैनिक कार्य सञ्चालनबारे सिकाइनेछ।
आभेरिनले हेलसिन्गिन उतिसेतलाई दिएको प्रतिक्रियामा व्यवसाय सुरु गर्नुअघि सावधानीपूर्वक योजना बनाउनु पर्नेमा जोड दिएकी छन्।
“उद्यमी बन्नका लागि विचार र उत्साह हुनु राम्रो हो, तर योजना बलियो हुनुपर्छ,” आभेरिन भन्छिन्।
तालिम बिजनेस भान्तासँगको सहकार्यमा आयोजना गरिएको हो। धेरै मानिसले रेस्टुरेन्ट खोल्ने इच्छा देखाएपछि यो आवश्यकता महसुस गरिएको थियो।
अहिलेको लागि तालिमको भाषा फिनिस तोकिएको छ। आभेरिनका अनुसार भविष्यमा यो तालिम अंग्रेजी भाषामा पनि सञ्चालन गर्नेबारे विचार भइरहेको छ।
रेस्टुरेन्ट क्षेत्रमा पहिलेको अनुभव नभए पनि आवेदन दिन सकिनेछ।
फिनल्यान्डमा रेस्टुरेन्ट व्यवसाय सुरु गर्नका लागि केही कानुनी प्रक्रियाहरू पूरा गर्नुपर्छ। उक्त जानकारी सो तालिममा दिइनेछ।
भान्ता फिनल्यान्डको चौथो ठूलो सहर हो। यहाँ आप्रवासीहरूको बाक्लो उपस्थिति रहेकाले बहुसांस्कृतिक रेस्टुरेन्टहरूको राम्रो सम्भावना छ।
