पूर्वी हेलसिन्कीस्थित कोन्तुला मेट्रो स्टेशन बाहिर एक ८० वर्षीया वृद्धाको चक्कु प्रहार गरी हत्या भएको छ।
प्रहरीले घटनास्थलबाट भागिरहेका ५० वर्षभन्दा माथिका एक शंकास्पद पुरुषलाई नियन्त्रणमा लिएका छन्।
घटना कोन्तुलाको कोन्तुलानकारी सडकको सार्वजनिक स्थानमा आज दिउँसो ११:२५ बजे भएको हो।
सडकमा हिंसात्मक आक्रमण भएलगत्तै घटनास्थलमा खटिएका स्वास्थ्यकर्मीहरूले हेलसिन्की प्रहरीलाई खबर गरेका थिए।
प्रहरीको प्रारम्भिक अनुसन्धान अनुसार मृतक र आक्रमणकारीबीच पहिले कुनै चिनजान थिएन।
शंकास्पद व्यक्तिले दिउँसै व्यस्त सडकको बीचमा वृद्धामाथि अचानक घातक प्रहार गरेका हुन्।
घटनाको वास्तविक कारण पत्ता लगाउन थप सोधपुछ र अनुसन्धान भइरहेको प्रहरीले बताएको छ।
कोन्तुला पूर्वी हेलसिन्कीको एक व्यस्त आवासीय र व्यावसायिक क्षेत्र हो, जहाँ सब-वे (मेट्रो) स्टेशन र बजार रहेका छन्।
कोन्तुला क्षेत्रमा नेपालीहरूको समेत बाक्लो बसोबास छ।
फिनल्यान्ड विश्वकै सुरक्षित देशहरूमध्ये एक मानिए पनि सार्वजनिक स्थानमा दिउँसै अपरिचित व्यक्तिबाट भएको यस्तो हिंसात्मक घटनाले स्थानीय बासिन्दाहरूमा सुरक्षा चासो र चिन्ता बढाएको छ।
