संक्षेपमा
- ३२ वर्षीय बिरालो युल्पीको हेलसिन्कीमा मृत्यु।
- गिनिज बुकमा नाम लेखाउने प्रक्रिया अधुरै।
- खरानीलाई औंठीमा राखेर जीवनभर सम्झना गरिने।
विश्वकै सबैभन्दा वृद्ध बिरालोको उपाधि दाबी गरिएको ३२ वर्षीय बिरालो युल्पीको हेलसिन्कीमा निधन भएको छ। युल्पीको निधनसँगै उसकी मालिक तीना कोर्होनेनले आफ्नो जीवनकै एक महत्त्वपूर्ण साथी गुमाएको फिनल्यान्डको सार्वजनिक प्रसारक YLE सँगको कुराकानीमा बताएकी छन्।
कोर्होनेनले हेलसिन्कीको भिकीस्थित पशु अन्त्येष्टि गृहबाट युल्पीको मृत्युको खबर दिएकी हुन्। उनले युल्पीलाई आफ्नो सबैभन्दा मिल्ने साथी र ‘जीवनको पुरुष’ भनेर बयान गरेकी छन्।
यसै वर्षको सुरुमा युल्पीलाई गिनिज वर्ल्ड रेकर्ड्समा दर्ता गराउन आवेदन दिइएको थियो। तर उक्त उपाधि प्रमाणित हुन नपाउँदै उसको ज्यान गएको हो।
युल्पी लामो समयसम्म निकै स्वस्थ रूपमा बाँचेको थियो। तर यसै वर्षको सुरुदेखि उसको मांसपेशी घट्ने र पेटको समस्या देखिन थालेको थियो।
केही दिनअघिदेखि उसले खाना खान पूर्ण रूपमा छाडेको थियो।
कस्तो थियो बुढो बिरालो युल्पी?
कोर्होनेनका अनुसार युल्पी निकै रमाइलो स्वभावको बिरालो थियो। ऊ पोथी बिरालोहरूसँग निकै नजिक हुन्थ्यो भने भाले बिरालोहरूको बीचमा आफूलाई बलियो देखाउँथ्यो।
“उ त साँच्चै ‘प्लेब्वाय’ नै थियो!” कोर्होनेन भन्छिन्। “एकपटक त उसले श्रीमती हुँदाहुँदै गर्लफ्रेन्ड पनि बनाएको थियो। पोथी बिरालोहरू वरिपरि हुँदा उ एकदमै ‘चार्मर’ बन्थ्यो, तर भाले बिरालोहरूको अगाडि चाहिँ फेरि ठूलो ‘डन’ बनेर देखाउँथ्यो।”
कोर्होनेनले हेलसिन्कीमा घरपालुवा जनावर स्याहार केन्द्र चलाउँछिन्। अरू बिरालोहरूको स्याहार गर्दा आफूलाई युल्पीको निधनको दुःख भुल्न मद्दत पुग्ने उनको कथन छ।
युल्पीको भौतिक शरीर बिदा भए पनि कोर्होनेनका लागि उसको सम्झना सधैं रहनेछ। उनले युल्पीको अलिकति खरानी औंठीमा राखेर जीवनभर लगाउने योजना बनाएकी छन्।
घरपालुवा बिरालोको औसत आयु सामान्यतया १२ देखि १५ वर्षसम्म हुन्छ। ३२ वर्षको उमेरसम्म बाँच्नु बिरालो प्रजातिको लागि अत्यन्त दुर्लभ र आश्चर्यजनक कुरा मानिन्छ।
हालसम्म गिनिज वर्ल्ड रेकर्ड्समा दर्ता भएको सबैभन्दा वृद्ध बिरालो अमेरिकाको ‘क्रिम पफ’ हो। उक्त बिरालो ३८ वर्ष ३ दिनसम्म बाँचेको थियो।
