.संक्षेपमा.
- संघीय एजेन्टहरूको आप्रवासन छापा र नेशनल गार्डको तैनाथी आन्दोलनको मुख्य कारण।
- आप्रवासी अधिकार समूह, मजदुर युनियन र सामुदायिक संस्थाहरूद्वारा विरोध प्रदर्शनको नेतृत्व।
- प्रदर्शनका क्रममा सवारी साधनमा आगजनी, झडप, र दर्जनौं पक्राउ, स्थिति तनावपूर्ण।
अमेरिकाको लस एन्जलसमा संघीय सरकारको आक्रामक आप्रवासन नीति र नेशनल गार्ड तैनाथ गर्ने निर्णयको विरोधमा हजारौं मानिसहरू सडकमा उत्रिएका छन्।
राष्ट्रपति डोनाल्ड ट्रम्पको आक्रामक आप्रवासन नीति र सेना परिचालन गर्ने कदमलाई अतिक्रमण मान्दै आप्रवासी समुदाय, मजदुर संगठन र अधिकारकर्मीहरूले व्यापक विरोध प्रदर्शन गरेका हुन्, जसका कारण शहरको जनजीवन प्रभावित बनेको छ।
लस एन्जलसका विभिन्न क्षेत्रमा, विशेष गरी कपडा कारखाना जस्ता आप्रवासी कामदारहरूको बाहुल्यता रहेका स्थानहरूमा संघीय एजेन्टहरूले छापा मारी सामूहिक रूपमा मानिसहरूलाई हिरासतमा लिएपछि आन्दोलन चर्किएको हो।
प्रदर्शनकारीहरूले यी कारबाहीहरूलाई सैन्यकरणको संज्ञा दिँदै यसको दीर्घकालीन असरप्रति चिन्ता र आक्रोश व्यक्त गरेका हुन्।
राष्ट्रपति ट्रम्पले लस एन्जलस क्षेत्रमा ७०० अमेरिकी मरिन र ४,००० नेसनल गार्डका सैनिकहरू पठाउने निर्णय गरेपछि स्थिति झनै बिग्रिएको हो। क्यालिफोर्नियाका गभर्नर गेभिन न्यूसम लगायत स्थानीय नेताहरूले संघीय सरकारको यो कदमको कडा शब्दमा विरोध गर्दै यसलाई गैरकानूनी र उत्तेजक भनेका छन्। न्यूसमले सेना परिचालनलाई “एक तानाशाह राष्ट्रपतिको विक्षिप्त कल्पना” भनेका छन्।
आन्दोलनको अगुवाइ आप्रवासी अधिकारका लागि संघर्षरत विभिन्न समूहहरू, मजदुर युनियनहरू र स्थानीय सामुदायिक संस्थाहरूले गरिरहेका छन्।
राष्ट्रिय दैनिक मजदुर संगठन सञ्जाल (National Day Laborer Organizing Network) जस्ता संस्थाहरू र स्थानीय युनियनका नेताहरूले विरोध र्याली तथा प्रदर्शन कार्यक्रमहरू आयोजना गर्न सक्रिय भूमिका खेलेका छन्।
प्रदर्शनमा हजारौंको संख्यामा आप्रवासी, मजदुर, अधिकारकर्मी तथा आम नागरिकहरूको सहभागिता रहेको छ। यस क्रममा प्रहरीले कयौं प्रदर्शनकारीहरूलाई पक्राउ गरेको छ, जसमा एसईआईयू क्यालिफोर्निया युनियनका अध्यक्ष पनि एक छापा मारिएको स्थान नजिकैको विरोध प्रदर्शनबाट पक्राउ परेका छन्।
लस एन्जलसको डाउनटाउन क्षेत्र तथा सरकारी कार्यालयहरू वरपर प्रदर्शनकारीहरूको ठूलो भीड लागेको समाचारहरूमा जनाइएको छ।
लस एन्जलसको सडकमा देखिएको यो जनआक्रोश, आप्रवासी समुदायमाथिको निरन्तर दमन र संघीय हस्तक्षेपको प्रत्यक्ष परिणाम हो।
केही स्थानहरूमा प्रदर्शनले हिंसात्मक रूप लिएको छ, जहाँ प्रदर्शनकारीहरूले सवारी साधनहरूमा आगजनी गर्ने, पेट्रोल बम प्रहार गर्ने तथा सुरक्षाकर्मीहरूमाथि ढुङ्गामुढा गरेको बताइएको छ। स्थितिलाई नियन्त्रणमा लिनका लागि अधिकारीहरूले केही प्रदर्शनहरूलाई “गैरकानूनी भेला” घोषित गर्दै अश्रु ग्यास र फ्ल्यासब्याङ्ग ग्रेनेड प्रहार गरेका छन्।
यी झडपहरूका कारण कयौं सेल्फ-ड्राइभिङ गाडीहरू जलेर नष्ट भएका छन् भने सार्वजनिक तथा निजी सम्पत्तिमा पनि क्षति पुगेको छ। केही व्यक्तिहरू घाइते भएको जनाइएको छ।
