.संक्षेपमा.
- मोबाइल प्रमाणीकरण अपडेटको बहानामा व्यक्तिगत जानकारी चोर्ने क्रम बढ्यो।
- पीडितको नाममा ठूलो रकमको ऋण र अन्य आर्थिक अपराध।
- प्रहरीद्वारा फोन मेसेजहरूप्रति सचेत रहन आग्रह।
हेलसिन्की प्रहरीले फिनल्यान्डमा एक नयाँ किसिमको साइबर ठगी फैलिएको भन्दै सर्वसाधारणलाई सचेत हुन आग्रह गरेको छ। प्रहरीका अनुसार पछिल्लो समय साइबर अपराधीहरूले मोबाइल प्रमाणीकरण (mobile authentication) प्रणालीको दुरुपयोग गरी ठगी गर्ने गरेको पाइएको हो।
प्रहरीका अनुसार यस्ता घटनाहरूमा अपराधीहरूले पीडितको पहिचान चोरी गरी १०,००० युरो भन्दा बढी ऋण लिएको र अन्य आर्थिक अपराध गरेको पाइएको छ।
प्रहरीका अनुसार यो ठगीमा अपराधीहरूले पीडितलाई मोबाइल प्रमाणीकरण अपडेट गर्नुपर्ने वा यससम्बन्धी कुनै काम गर्नुपर्ने भन्दै एसएमएस पठाउने गर्छन्। यस्ता मेसेजहरूमा प्राय: लिङ्कहरू समावेश गरिएका हुन्छन् र तत्काल लिङ्क क्लिक गर्नुस् भनेर सुझाव दिइएको हुन्छ।
प्रहरीले आफ्नो बैङ्क खाता वा मोबाइल प्रमाणीकरणसँग सम्बन्धित कुनै पनि जानकारी अन्य व्यक्तिलाई नदिन समेत सचेत गराएको छ। यदि कुनै व्यक्ति यस्तो ठगीको सिकार भएको शङ्का लागेमा तत्काल आफ्नो बैङ्क, मोबाइल सेवा प्रदायक र प्रहरीमा सम्पर्क गर्न सुझाव दिइएको छ।
