📺 नेपालीलाइनेनका भिडियोहरू अब YouTube मा हेर्नुहोस्।
▶️ Let's Go.संक्षेपमा.
- कुकुरले टोक्दा तीन महिनाभन्दा कम उमेरका शिशुको मृत्यु।
- घटना एक निजी निवासमा भएको थियो।
- कुकुर मालिकमाथि लापरबाहीले मृत्यु गराएको आशंकामा अनुसन्धान सुरू।
फिनल्यान्डको प्रहरीले ताम्पेरेमा गत डिसेम्बरमा भएको एक शिशुको मृत्युको घटनामा अनुसन्धान गरिरहेको जनाएको छ। फिनिस प्रहरीले सोमबार निकालेको विज्ञप्ति अनुसार ताम्पेरेको एक निजी निवासमा कुकुरले टोकेपछि तीन महिनाभन्दा कम उमेरका शिशुको मृत्यु भएको थियो।
यो दुःखद घटना गत वर्ष (२०२४) को डिसेम्बर महिनामा भएको थियो। प्रहरीले घटनामा कुकुरको मालिकलाई लापरबाहीले मृत्यु गराएको (फिनिसमा ‘kuolemantuottamus’) आशंका गरेको छ र सोही आधारमा अनुसन्धान अगाडि बढाएको छ।
प्रहरीले घटनाको संवेदनशीलता र अनुसन्धान जारी रहेको भन्दै यस विषयमा थप जानकारी दिन अस्वीकार गरेको छ। “विषयको संवेदनशीलता र अनुसन्धान जारी रहेकोले प्रहरीले यस घटनाबारे थप टिप्पणी गर्ने छैन।” विज्ञप्तिमा भनिएको छ।
फिनल्यान्डको तथ्याङ्क विभाग (Tilastokeskus) को तथ्याङ्क अनुसार सन् १९९८ देखि २०२३ सम्मको २५ वर्षको अवधिमा फिनल्यान्डमा कुकुरको आक्रमणबाट कुल ३५ जनाको मृत्यु भएको छ।
कुकुरको टोकाइ वा आक्रमणबाट मृत्यु हुने ताम्पेरेका शिशु दोस्रो बच्चा हुन्। यसअघि सन् २००८ मा एलिमाकी (हाल कौभोलाको हिस्सा) मा आफ्नै परिवारको कुकुरले आक्रमण गर्दा एक १० वर्षीय बालकको मृत्यु भएको थियो।
कुकुरहरूले साना बालबालिकालाई किन टोक्छन्?
पशु विज्ञहरूका अनुसार कुकुरले साना बालबालिकालाई प्रायः आक्रामकताले भन्दा पनि डर, तनाव वा आत्मरक्षाका लागि टोक्ने गर्छन्। बालबालिकाको अप्रत्याशित चाल, चर्को आवाज, वा अचानकको व्यवहारले कुकुरलाई तर्साउन सक्छ।
कहिलेकाहीँ सिकारको रूपमा पनि कुकुरले आक्रमण गर्ने गर्छन्।
विभिन्न अध्ययनहरूले देखाए अनुसार बालबालिकालाई हुने धेरैजसो टोकाइका घटनाहरू परिचित कुकुरबाटै हुन्छन् र प्रायः रोक्न सकिने खालका हुन्छन्।
कुकुर जतिसुकै मिलनसार भए पनि साना बालबालिका र कुकुरलाई कहिल्यै एक्लै छोड्न नहुने पशु विज्ञहरू सुझाउँछन्।
नेपालीलाइनेनबाट थप:
निर्मल पुर्जाको मृत्युपछि पूर्व मिस फिनल्यान्डलाई 'हेट मेसेज'को वर्षा, ज्यान मार्ने धम्की
एसडिपीको नयाँ 'आप्रवासी नीति'ले फिनिस राजनीति तरङ्गितः के छ आप्रवासी नेताको मत?
हेलसिन्की-तालिन सुरुङ रेलमार्गको चर्चा फेरी सुरू, निर्माण सम्पन्न भए हुनेछ 'गेम चेन्जर'
समुद्रमा तैरिने सहर: यस्ता छन् फिनल्यान्डमा बनेका संसारकै सबैभन्दा ठुला पानीजहाज
प्रिय पाठक, हाम्रो 'सहयोगी सदस्य' बनी हाम्रो कामलाई सघाउनुहोस्। साथै हाम्रा सबै प्रिमियम सामाग्री पढ्नुहोस्।
