हेलसिन्कीमा अचम्मको सुधारः बाह्र महिनामा सडक दुर्घटनामा मर्नेको संख्या सुन्य!

फिनल्यान्डको राजधानीमा विगत एक वर्षमा सडक दुर्घटनाका कारण कसैको पनि मृत्यु नभएको हेलसिन्की प्रहरीले जनाएको छ। प्रहरीका अनुसार गत वर्ष जुलाईमा कन्तुलामा भएको दुर्घटनामा एकजनाको ज्यान गएको थियो। त्यस यताका बाह्र महिनामा हेलसिन्कीमा सडक दुर्घटनामा कसैले ज्यान गुमाउनु परेको छैन।

यो उपलब्धिलाई ट्राफिक सुरक्षा, पूर्वाधार विकास र निरन्तर निगरानीमा गरिएको लामो अवधिको प्रयासको सफल परिणामका रूपमा हेरिएको छ।

“हेलसिन्कीमा गत एक वर्षमा सडकमा कसैको पनि ज्यान गएको छैन। यो एउटा असाधारण खुशीको कुरा हो।” ट्राफिक निगरानी निर्देशक, सुपरिटेन्डेन्ट डेनिस पास्टरस्टेनले एक विज्ञप्तिमा भनेका छन्, “ट्राफिक सुरक्षा, पूर्वाधार र निगरानीमा गरिएको दीर्घकालीन लगानीले काम गरेको छ भन्ने यसले देखाउँछ।”

उनले विशेष गरी सहरी योजना, गति सीमाको उचित व्यवस्थापन र पैदलयात्रीहरूको सुरक्षामा गरिएको सुधारले सडकहरू सुरक्षित बनाएको बताए।

यही अवधिमा मादक पदार्थ सेवन गरी सवारी चलाउने र अन्य केही अपराधका घटनाहरू भने बढेका छन्। तर युवा अपराधमा आएको कमीले प्रहरीलाई उत्साहित बनाएको छ।

यस्तो छ अन्य अपराधको अवस्था

सबै तथ्याङ्कहरू भने सकारात्मक छैनन्। प्रहरीका अनुसार यो वर्षको सुरुदेखि मादक पदार्थ सेवन गरी सवारी चलाएको आरोपमा ७८८ जना पक्राउ परेका छन्, जुन गत वर्षभन्दा १५ प्रतिशतले बढी हो। गम्भीर रूपमा ट्राफिक सुरक्षालाई जोखिममा पार्ने घटनाहरूमा पनि लगभग ७ प्रतिशतले वृद्धि भएको छ। प्रहरीलाई आउने आपतकालीन कलहरूको संख्या १२ प्रतिशतले र प्रहरीमा दर्ता भएका समग्र अपराधका घटनाहरू ९ प्रतिशतले बढेका छन्।

१८ वर्ष मुनिका युवाहरूले गर्ने अपराधमा करिब ५ प्रतिशतले कमी आएको छ। विशेष गरी लुटपाटका घटनाहरूमा आएको कमी उत्साहजनक छ। १५ देखि १७ वर्ष उमेर समूहका युवाहरूले गर्ने लुटपाटका घटनामा ३४.३७ प्रतिशत र १५ वर्षभन्दा कम उमेरकाहरूले गर्ने यस्ता अपराधमा ७१.४२ प्रतिशतले कमी आएको छ।

आपतकालीन कल र अपराधका घटनाहरू बढे पनि हेलसिन्की प्रहरी विभागले आफ्नो कार्य क्षमतामा सुधार आएको बताएको छ।