हेलसिन्कीमा एक अनौठो घटनामा प्रहरीको गाडीबाटै हतियारसहितको झोला चोरी भएको छ। यद्यपि प्रहरीले चोरी भएको झोला र हतियार २४ घण्टाभित्रै फेला पारेको जनाएको छ।
यो घटना गत आइतबार अगस्ट १० को साँझतिर भएको हो। पूर्वी उसिमा प्रहरीका अनुसार हेलसिन्कीमा रहेको प्रहरीको गाडीबाट हतियार राखिएको झोला चोरी भएको थियो।
“घटनालाई गम्भीर चोरी र गम्भीर आग्नेयास्त्र अपराधको रूपमा अनुसन्धान भइरहेको छ।” घटनाबारे जानकारी दिँदै अनुसन्धान प्रमुख मारी आयोमाले भनेकि छिन्।
प्रहरीको सक्रियताका कारण चोरी भएको झोला र त्यसमा रहेको हतियार दुवै एक दिनभित्रै प्रहरीको नियन्त्रणमा आएको थियो। प्रहरीले सोमबार मात्रै यसबारे आधिकारिक जानकारी सार्वजनिक गरेको हो।
घटनाबारे प्रहरीले प्रारम्भिक अनुसन्धान जारी राखेको छ। घटना कसरी र कसले घटायो भन्नेबारे थप विवरणहरू अनुसन्धानपछि मात्र सार्वजनिक गरिने बताइएको छ।
