.संक्षेपमा.
- अष्ट्रेलियाभर आप्रवासनको विरोधमा विशाल प्रदर्शन।
- उग्र-दक्षिणपन्थी समूह र केही राजनीतिज्ञहरूले र्यालीलाई समर्थन गरे।
- सरकारले प्रदर्शनलाई विभाजनकारी र घृणित भन्दै निन्दा गरेको छ।
अष्ट्रेलियाका प्रमुख सहरहरूमा हजारौँ मानिसहरू आप्रवासन विरोधी र्यालीमा सहभागी भएका छन्। सरकारले यी प्रदर्शनहरूलाई उग्र-दक्षिणपन्थी समूहसँग सम्बन्धित र “घृणा फैलाउने” भन्दै निन्दा गरेको छ।
सिड्नी, मेलबर्न लगायतका अन्य प्रमुख सहरहरूमा “मार्च फर अष्ट्रेलिया” नाम दिइएका यी र्यालीहरूमा प्रदर्शनकारी र विपक्षमा प्रदर्शन गर्नेहरूबीच केही झडपहरू पनि भएका छन्।
एबीसीका अनुसार सिड्नीमा भएको र्यालीमा करिब ८,००० मानिसहरू भेला भएका थिए। प्रहरीले सहरभरि सयौँ अधिकारीहरू तैनाथ गरिएको तर “कुनै ठूलो अप्रिय घटना” नभएको जनाएको छ। मेलबर्नमा भने प्रदर्शनकारीहरूको अर्को प्यालेस्टाइन समर्थक र्यालीमा सहभागीहरूसँग झडप भएको थियो।
एडिलेडमा प्रहरीले र्याली र विपक्षमा भएको प्रदर्शनमा गरी कुल १५,००० मानिस उपस्थित रहेको अनुमान गरेको छ। स्थानीय सञ्चारमाध्यमका अनुसार त्यहाँको भीड “सामान्यतया शान्तिपूर्ण” रहेको थियो। केही विपक्षी राजनीतिज्ञहरू, नव-नाजी व्यक्तित्वहरू, र कोभिड-१९ महामारीको समयमा चर्चामा आएका लकडाउन विरोधी अभियानकर्ताहरूले यी र्यालीहरूको प्रचार गरेका थिए।
प्रदर्शनका आयोजकहरूले आफ्नो वेबसाइटमा “सामूहिक आप्रवासनले समुदायलाई एकसाथ जोड्ने बन्धनलाई तोडेको” बताएका छन्। उनीहरूले संस्कृति, ज्याला, आवास, अपराध र वातावरणीय विनाश जस्ता विषयमा पनि चिन्ता व्यक्त गरेका छन्।
अष्ट्रेलिया सरकारले भने यी र्यालीहरूको कडा विरोध गरेको छ।
“हाम्रो देशमा सामाजिक एकतालाई कमजोर पार्ने र विभाजन ल्याउन खोज्नेहरूका लागि कुनै ठाउँ छैन।” गृहमन्त्री टोनी बर्कले भनेका छन्।
“हामी हामीलाई विभाजित गर्न खोज्ने र आप्रवासी समुदायलाई धम्क्याउन खोज्नेहरू विरुद्ध सबै अष्ट्रेलियालीहरूको साथमा उभिएका छौं।” बहुसांस्कृतिक मामिला मन्त्री डा. एनी अलीले भनेकी छिन्।
हालैका वर्षहरूमा अष्ट्रेलियामा दक्षिणपन्थी अतिवाद बढेको देखिएको छ। यसै वर्षको सुरुमा सरकारले नाजी सलामलाई अनिवार्य जेल सजाय हुने गरी कानुनी रूपमा दण्डनीय बनाएको थियो।
