.संक्षेपमा.
- पोर्चुगलको कार्तासोमा ३८ वर्षीय नेपालीले गरे स्थानीय नागरिकको हत्या।
- खाना बनाउने विषयमा भएको विवादमा छुरा प्रहारबाट ३० वर्षीय पोर्चुगिजको मृत्यु।
- घटनापछि पोर्चुगल सरकारले आप्रवासीमाथि थप कडाइ गर्नसक्ने त्रास बढ्यो।
पोर्चुगलमा एक नेपाली नागरिकले स्थानीय पोर्चुगिजको नागरिकको हत्या गरेको आरोप लागेको छ।
गत आइतबार, सेप्टेम्बर १४, २०२५ मा पोर्चुगलको कार्तासो भन्ने स्थानमा एक ३८ वर्षीय नेपाली पुरुषले आफ्नै घरमा सँगै बस्ने ३० वर्षीय पोर्तुगिज साथीको हत्या गरेको अभियोग लागेको हो।
स्थानीय सञ्चारमाध्यमका अनुसार बेलुकाको खाना बनाउने क्रममा भएको सामान्य विवादले उग्र रूप लिँदा नेपाली पुरुषले भान्साको चक्कुले साथीको घाँटीमा प्रहार गरेका थिए।
आक्रमणबाट गम्भीर घाइते भएका पोर्चुगिज युवाको घटनास्थलमै मृत्यु भएको थियो। घटनालगत्तै आरोपी नेपाली फरार भएका छन् र प्रहरीले उनको खोजी कार्य तीव्र पारेको छ।
पोर्चुगलको न्यायिक प्रहरी (Polícia Judiciária) ले अनुसन्धानको जिम्मा लिएको छ र संदिग्धको फोटो तथा विवरण देशभर वितरण गरेको छ। पोर्चुगलका स्थानीय संचारमाध्यमले यो घटनाका बारे प्राथमिकताका साथ लेखेका छन्।
हत्याको खबरले आप्रवासी विरोधी भावनालाई थप बढावा दिनसक्ने विश्लेषण गरिएको छ।
पोर्चुगलमा आप्रवासीहरूले स्थानीय सरहको अधिकार पाउनुपर्ने भन्दै प्रदर्शन गरिरहेका बेला यो घटना भएको हो। बुधबार मात्रै आप्रवासीहरूले राजधानी लिस्बनको संसद भवन अगाडि नागरिकता लगायतका अधिकारको माग गर्दै प्रदर्शन गरेका थिए।
यो हत्याको खबरले आप्रवासी विरोधी भावनालाई थप बढावा दिनसक्ने विश्लेषण गरिएको छ। गैर-आवासीय नेपाली संघ (NRNA) पोर्चुगलले पनि घटनाको पुष्टि गरेको छ।
पोर्चुगलमा पाँच वर्षदेखि वसिरहेका एक नेपालीका अनुसार यो घटनाले पोर्चुगल सरकारलाई आप्रवासी नीतिमा थप कठोर बन्न दबाब सिर्जना गर्ने र यसको असर सम्पूर्ण नेपाली लगायतका आप्रवासी समुदायमा पर्नसक्ने त्रास बढेको छ।
