📺 नेपालीलाइनेनका भिडियोहरू अब YouTube मा हेर्नुहोस्।
▶️ Let's Go.संक्षेपमा.
- बढ्दो बेरोजगारीका कारण दक्ष जनशक्ति विदेश पलायन हुने (ब्रेन ड्रेन) बारे फिनिस सरकार चिन्तित।
- विदेशमा केही वर्ष काम गरेर फर्किनेहरूलाई करमा विशेष छुट दिने तयारी।
- फिनल्यान्डको बेरोजगारी दर युरोपेली संघमै उच्च, वर्षको अन्त्यसम्ममा सुधार हुने मन्त्रीको दाबी।
फिनल्यान्डको अर्थतन्त्रले सुस्त गतिको सामना गरिरहेको र बेरोजगारी दर बढिरहेको बेला सरकारले ‘ब्रेन ड्रेन’ अर्थात् दक्ष जनशक्तिको पलायन रोक्न एक नयाँ योजना अघि सारेको छ।
श्रम मन्त्री मातियास मार्टिनेनका अनुसार विदेशमा काम गर्न गएका फिनिस नागरिकहरूलाई स्वदेश फर्कन प्रोत्साहित गर्न विशेष कर छुटको व्यवस्था गरिने भएको हो।
फिनल्यान्डको बेरोजगारी दर युरोपेली मापदण्डमा समेत चिन्ताजनक अवस्थामा पुगेको समयमा यो घोषणा आएको हो । अगस्ट महिनाको तथ्यांक अनुसार बेरोजगारी दर १०.१ प्रतिशत पुगेको छ, जुन स्पेनपछि युरोपेली संघ (EU) मा दोस्रो सबैभन्दा उच्च हो।
मन्त्री मार्टिनेनले YLE टेलिभिजनको ‘Ykkösaamu’ कार्यक्रममा बोल्दै ‘ब्रेन ड्रेन’ प्रति आफू चिन्तित रहेको बताए। फिनल्यान्डका शिक्षित र दक्ष जनशक्ति राम्रो रोजगारीको अवसर खोज्दै विदेशिने र उतै बस्ने क्रम बढ्ने अवस्था देखिएको उनले बताए।
यसलाई रोक्न सरकारले कर प्रोत्साहनको नीति तयार पारिरहेको छ।
“विदेशमा काम गर्न गएका फिनिस नागरिकहरूले स्वदेश फर्किएमा उनीहरूलाई निश्चित अवधिका लागि विशेष कर छुट दिइने तयारी छ,” मार्टिनेनले भने।
यो सुविधा पाउनका लागि विदेशमा निश्चित वर्ष बसेको हुनुपर्ने जस्ता शर्तहरू पूरा गर्नुपर्नेछ। मन्त्रीका अनुसार यो प्रस्ताव यसै वर्षको अन्त्यसम्ममा संसदमा पेस गरिनेछ।
“हाम्रा युवाहरूका लागि एउटा महत्त्वपूर्ण सन्देश हो।” उनले भने, “उनीहरूमध्ये धेरै यहाँ काम गर्न फर्कनेछन् भन्ने हाम्रो आशा छ।”
श्रम बजारका विश्लेषकहरूले भने तथ्यांकमा देखिए जस्तो निराशाजनक अवस्था नभएको बताएका छन्। उनीहरूका अनुसार काम गरिएका घण्टाहरूको संख्यामा सामान्य मात्र कमी आएको छ, जसले अवस्था छिट्टै सुध्रिन सक्ने संकेत गर्दछ।
मन्त्री मार्टिनेनले पनि भविष्यप्रति आशावादी रहेको बताएका छन्। उनले तुर्कु सिपयार्डको नयाँ अर्डर, फाजेर चकलेट फ्याक्ट्रीको निर्माण र पोरीमा नयाँ रोजगारीका अवसरहरू जस्ता सकारात्मक आर्थिक गतिविधिहरूले वर्षको अन्त्यसम्ममा रोजगारीको अवस्थामा सुधार ल्याउने विश्वास व्यक्त गरे।
नेपालीलाइनेनबाट थप:
निर्मल पुर्जाको मृत्युपछि पूर्व मिस फिनल्यान्डलाई 'हेट मेसेज'को वर्षा, ज्यान मार्ने धम्की
एसडिपीको नयाँ 'आप्रवासी नीति'ले फिनिस राजनीति तरङ्गितः के छ आप्रवासी नेताको मत?
हेलसिन्की-तालिन सुरुङ रेलमार्गको चर्चा फेरी सुरू, निर्माण सम्पन्न भए हुनेछ 'गेम चेन्जर'
समुद्रमा तैरिने सहर: यस्ता छन् फिनल्यान्डमा बनेका संसारकै सबैभन्दा ठुला पानीजहाज
प्रिय पाठक, हाम्रो 'सहयोगी सदस्य' बनी हाम्रो कामलाई सघाउनुहोस्। साथै हाम्रा सबै प्रिमियम सामाग्री पढ्नुहोस्।
