फिनल्यान्डको हेलसिन्कीस्थित पुनरावेदन अदालतले नेपाली रेस्टुरेन्ट व्यवसायी देवी शर्मा र उनकी श्रीमतीलाई मानव बेचबिखन र गम्भीर शोषणमा दोषी ठहर गरेको छ।
सन् २०२३ मा हेलसिन्की जिल्ला अदालतले सुनाएको १ वर्ष ८ महिनाको निलम्बित जेल सजायलाई पुनरावेदन अदालतले सदर गरेको हो।
शर्मा दम्पतीले सुरुमा जिल्ला अदालतको फैसलाविरुद्ध पुनरावेदन गरेका थिए। तर गत महिना सुनुवाइ सुरु हुनुभन्दा अघि उनीहरुले आफ्नो पुनरावेदन फिर्ता लिएका थिए।
पुनरावेदन फिर्ता लिएसँगै नोभेम्बरमा अदालतले तल्लो अदालतको फैसला नै कायम रहने निर्णय सुनाएको हो। अदालतले उनीहरुलाई पीडितहरुलाई सयकडौं हजार युरो क्षतिपूर्ति तिर्न आदेश दिएको छ।
यो मुद्दामा एक घरेलु कामदार र अर्का रेस्टुरेन्टमा कार्यरत भान्से (कुक) गरि दुई जना पीडित छन्।
सञ्चालकहरुलाई घरेलु कामदारको मानव बेचबिखन र भान्सेमाथि गम्भीर शोषण गरेको अभियोग लागेको थियो।
सन् २०१७ मा पीडितहरुले उजुरी दिए पनि प्रहरी अनुसन्धानमा भएको ढिलाइले यो मुद्दा टुंगिन लामो समय लागेको थियो।
सन् २०१७ मा पीडितहरुले उजुरी दिए पनि प्रहरी अनुसन्धानमा भएको ढिलाइले यो मुद्दा टुंगिन लामो समय लागेको थियो।
शर्मा दम्पतीले ती घरेलु कामदारलाई तलब, भत्ता र पीडाको क्षतिपूर्ति बापत १ लाख ८० हजार युरोभन्दा बढी तिर्नुपर्ने फैसला भएको छ। पीडित भान्सेलाई तलब, बिदाको रकम र क्षतिपूर्ति गरी १ लाख ४० हजार युरोभन्दा बढी तिर्नुपर्नेछ।
यो विषयमा स्थानीय फिनिस पत्रिकाहरूले पनि समाचार लेखेका छन्।
