📺 नेपालीलाइनेनका भिडियोहरू अब YouTube मा हेर्नुहोस्।
▶️ Let's Goसंक्षेपमा
- ६ जनामाथि मानव बेचबिखन र यौनधन्दाको आरोप।
- झुटो आश्वासन दिएर पीडितलाई हेलसिन्की बोलाइयो।
- संदिग्धले गरेका थिए पीडितको कमाइ र स्वतन्त्रतामाथि नियन्त्रण।
हेलसिन्की प्रहरीले मानव बेचबिखन र यौन धन्दासँग सम्बन्धित एक गम्भीर अपराधको अनुसन्धान पूरा गरेको जनाएको छ। प्रहरीका अनुसार यस प्रकरणमा ६ जनालाई संदिग्धको रूपमा हेरिएको छ र मुद्दा अब सरकारी अभियोजनमा पुगेको छ।
प्रहरीलाई सेप्टेम्बर २०२५ मा यो अपराधबारे जानकारी प्राप्त भएको थियो। घटनाहरू २०२५ को अटममा केही महिनासम्म चलेको र पक्राउपछि रोकिएको प्रहरीको विज्ञप्तिमा उल्लेख छ।
प्रहरीका अनुसार स्पेनमा बस्ने फिनिस मूलका र फिनल्यान्डमै बस्ने संदिग्धहरूले हेलसिन्की क्षेत्रमा विभिन्न व्यक्तिहरूलाई यौन धन्दामा लगाएका थिए। उनीहरूले फिनिस नागरिकहरूलाई नै निशाना बनाएका थिए।
पीडितहरू व्यक्तिगत कारणले कमजोर सामाजिक स्थितिमा रहेको र त्यही कमजोरीको फाइदा उठाउँदै उनीहरूलाई शोषणको जोखिममा पारिएको प्रहरीले जनाएको छ।
अनुसन्धान प्रमुख आन्ने हिएतालाका अनुसार पीडितहरूलाई राम्रो कमाइ र सुविधाको झुटो प्रलोभन देखाइएको थियो। उनीहरूलाई राजधानी क्षेत्रमा यौन सेवा दिन बोलाइएको थियो।
“उनीहरूका लागि यौन सेवा दिने प्लेटफर्महरूमा विज्ञापन राखिएको थियो,” हिएतालाले विज्ञप्तिमा भनेकी छिन्। संदिग्धहरूले पीडितको काम गर्ने समय, ग्राहकको चाप र सेवाबापत आएको पैसा सबै आफूहरूले नै व्यवस्थापन गर्थे।
आरोपीहरूले पीडितहरूको स्वतन्त्रता र हिँडडुलमा समेत रोक लगाएका थिए। यौन सेवाबाट आएको अधिकांश रकम संदिग्धहरूकै हातमा जाने गरेको थियो।
यो घटनामा ६ जनालाई पक्राउ गरी अनुसन्धान अगाडि बढाइएको थियो। मुख्य आरोपीहरू अझै पनि हिरासतमै रहेको प्रहरीले जनाएको छ।
फिनल्यान्डमा मानव बेचबिखनका घटनाहरू प्रायः विदेशी कामदार वा आप्रवासीहरूसँग जोडिएर आउने गर्छन्, तर आफ्नै नागरिकहरू (फिनिस) नै पीडित भएको यो जस्तो घटना विरलै सुनिन्छ।
फिनल्यान्डको कानुन अनुसार मानव बेचबिखन र यौन शोषण निकै गम्भीर अपराध मानिन्छ, जसमा दोषी ठहर भए लामो जेल सजाय हुन सक्छ।
नेपालीलाइनेनबाट थप:
निर्मल पुर्जाको मृत्युपछि पूर्व मिस फिनल्यान्डलाई 'हेट मेसेज'को वर्षा, ज्यान मार्ने धम्की
एसडिपीको नयाँ 'आप्रवासी नीति'ले फिनिस राजनीति तरङ्गितः के छ आप्रवासी नेताको मत?
हेलसिन्की-तालिन सुरुङ रेलमार्गको चर्चा फेरी सुरू, निर्माण सम्पन्न भए हुनेछ 'गेम चेन्जर'
समुद्रमा तैरिने सहर: यस्ता छन् फिनल्यान्डमा बनेका संसारकै सबैभन्दा ठुला पानीजहाज
प्रिय पाठक, हाम्रो 'सहयोगी सदस्य' बनी हाम्रो कामलाई सघाउनुहोस्। साथै हाम्रा सबै प्रिमियम सामाग्री पढ्नुहोस्।
