कागजी चिठ्ठी पठाउन बन्द गर्दै KELA, कारण छ यस्तो

फिनल्यान्डको सामाजिक सुरक्षा संस्था KELA ले आफ्ना सेवाग्राहीलाई पठाउने कागजी चिठ्ठी र सूचनाहरूको सट्टा अब डिजिटल माध्यम प्रयोग गर्ने घोषणा गरेको छ। यो परिवर्तन जनवरी १५ तारिख बिहीबारदेखि लागू हुनेछ।

गत वर्षको नोभेम्बरमा सम्पन्न KELA को सुधार योजना अनुसार खर्च घटाउन यो कदम चालिएको हो। सन् २०२५ मा केलाले ६० लाख कागजी र ९० लाख डिजिटल चिठ्ठी पठाएको थियो।

कागजी चिठ्ठीमा गरिएको कटौतीले KELA को छपाइ र हुलाक खर्चमा करिब ६० लाख युरो बचत भएको छ। अब सेवाग्राहीले आफ्ना निर्णयहरू OmaKela अनलाइन पोर्टलमा प्राप्त गर्नेछन्।

ईमेल वा फोन नम्बर दर्ता गरेका प्रयोगकर्ताले नयाँ सूचना आएको जानकारी मेसेज मार्फत पाउनेछन्। यस्ता जानकारी ‘सुओमी डट एफआई’ (Suomi.fi), ईमेल वा एसएमएसबाट पठाइनेछ।

यद्यपि OmaKela प्रयोग गर्नेले चाहेमा अझै पनि कागजी चिठ्ठी नै रोज्न पाउने विकल्प छ। यसका लागि सेवाग्राहीले OmaKela पोर्टल वा ग्राहक सेवा केन्द्रमा सम्पर्क गरी अनुरोध गर्नुपर्नेछ।

विज्ञापन

 

 

 

थप पढ्नुहोस्

विज्ञापन सकियो

अनलाइन सेवा प्रयोग नगर्ने व्यक्तिहरूका हकमा भने KELA ले साविक बमोजिम नै हुलाकबाट चिठ्ठी पठाउनेछ।

KELA फिनल्यान्डमा बसोबास गर्नेहरूलाई बेरोजगारी भत्ता, आवास सहायता, स्वास्थ्य उपचार खर्च र विद्यार्थी वृत्ति जस्ता विभिन्न सामाजिक सुविधाहरू प्रदान गर्ने मुख्य सरकारी निकाय हो।

फिनल्यान्ड सरकारले पछिल्लो समय सार्वजनिक खर्च कटौती गर्न र डिजिटल प्रणालीलाई सुदृढ बनाउन सरकारी संयन्त्रहरूमा विभिन्न सुधारका कार्यक्रमहरू ल्याइरहेको छ।