संक्षेपमा
- महिलाको मृत्यु भएको प्रहरीद्वारा पुष्टि।
- गम्भीर घाइते पुरुषमाथि हत्याको आशंका।
- घटनास्थलमा प्रहरीद्वारा अनुसन्धान जारी।
हेलसिन्कीको माल्मीनकार्तानोस्थित एक निजी निवासमा भएको हिंसात्मक घटनामा एक महिलाको ज्यान गएको छ भने र एक पुरुष गम्भीर घाइते भएका छन्।
प्रहरीले घटनालाई शंकास्पद हत्याको रुपमा अनुसन्धान गरिरहेको छ।
घटना हिजो शनिबार दिउँसो माल्मीनकार्तानोको Neulastie मा रहेको अपार्टमेन्टमा भएको हो।
प्रहरीले अपार्टमेन्टभित्र एक महिलालाई अचेत र एक पुरुषलाई गम्भीर घाइते अवस्थामा फेला पारेको थियो।
प्रहरीले मिडियालाई दिएको जानकारी अनुसार ती महिलाको मृत्यु भइसकेको छ।
गम्भीर घाइते भएका पुरुषलाई तत्कालै उपचारका लागि अस्पताल लगिएको थियो। प्रहरीले उनलाई नै महिलाको हत्या गरेको प्रारम्भिक आशंका गरेको छ।
घटनास्थलमा प्रहरी र एम्बुलेन्सका धेरै टोलीहरू परिचालन गरिएको थियो। प्रहरीले घटनाको पृष्ठभूमि र घटनाक्रमबारे विस्तृत अनुसन्धान गरिरहेको जनाएको छ।
घटनाबारे थप जानकारी अनुसन्धानमा असर नपर्ने गरी मात्र सार्वजनिक गरिने प्रहरीले बताएको छ।
माल्मीनकार्तानो हेलसिन्कीको पश्चिमी भागमा पर्ने आवासीय क्षेत्र हो। यो क्षेत्रमा विदेशी विद्यार्थीहरू लगायत आप्रवासीहरूको पनि बसोबास बाक्लो छ।
फिनल्यान्डमा हुने अधिकांश हत्या वा हिंसाका घटनाहरू प्रायः चिनजानकै व्यक्तिहरू वा पारिवारिक सदस्यहरूबीच हुने तथ्यांकले देखाउँछ।
