उपहारमा पाएको महँगो रक्सीले निम्त्यायो फिनल्यान्डकी अर्थमन्त्रीलाई नैतिक संकट

फिनल्यान्डकी अर्थमन्त्री रिक्का पुर्राले झन्डै ८०० युरो मूल्यको महँगो स्याम्पेन उपहार स्वरूप स्वीकार गरेको तथ्य सार्वजनिक भएको छ।

हेलसिन्की सानोमातले गरेको अनुसन्धान अनुसार मन्त्रीहरूले २०० युरोभन्दा बढीको उपहार लिन नपाउने आचारसंहिता भए पनि पुर्रासहित अन्य मन्त्रीहरूले त्यसको उल्लंघन गरेका हुन्।

पुर्राले उक्त रक्सीको मूल्य सरकारी उपहार दर्ता किताबमा ४०० युरो मात्र उल्लेख गरेकी छिन्। तर समाचारका अनुसार उक्त स्याम्पेनको वास्तविक बजार मूल्य ८०० युरोको हाराहारीमा पर्छ।

अर्थमन्त्रीले आफ्नो बचाउ गर्दै उक्त बोतल टेबलमा ल्याउँदा पहिल्यै खोलिएको दाबी गरिन्। फुर्सदको समयमा र अनौपचारिक रूपमा पाइने यस्ता उपहार दर्ता गर्नुपर्ने हो कि होइन भन्नेमा आफू अन्योलमा रहेको उनले बताइन्।

“अरूले बारमा रक्सी पाउँदा दर्ता गर्छन् कि गर्दैनन् मलाई थाहा छैन,” उनले इमेलमार्फत हेलसिन्की सानोमातलाई भनिन्। आफूले पारदर्शी हुनका लागि मात्र उक्त जानकारी दर्ता गराएको उनको तर्क छ।

उक्त पत्रिकाका अनुसार वर्तमान सरकारका अन्य मन्त्रीहरूले पनि महँगा उपहार लिएको भेटिएको छ।

गतवर्ष प्रधानमन्त्री ओर्पो र वातावरण मन्त्री सारी मुल्तालाले ८६५ युरो बराबरको रुइस-रक महोत्सवको टिकट उपहार लिएका थिए। त्यसले पनि धेरै विवाद निम्त्याएको थियो।

प्रधानमन्त्री कार्यालयले भने उपहारसम्बन्धी यी निर्देशिकाहरू कानुनी रूपमा बाध्यकारी नभएको बताएको छ। यसले गर्दा मन्त्रीहरूले महँगा उपहार लिँदा पनि कानुनी कारबाही नै हुने आधार भने देखिँदैन।

फिनल्यान्डमा सार्वजनिक पदमा रहेका व्यक्तिहरूले लिने उपहारले उनीहरूको निर्णय प्रक्रियामा प्रभाव पार्न सक्ने भन्दै आलोचना भइरहेको छ।

करदाताको पैसाबाट चल्ने सरकारका प्रतिनिधिहरूले यस्ता महँगा ‘गिफ्ट’ लिनु नैतिकता विपरित मानिन्छ।

फिनल्यान्ड विश्वकै कम भ्रष्टाचार हुने देशहरूमध्ये एक मानिन्छ। यहाँ सरकारी अधिकारीहरूका लागि कडा नैतिक नियमहरू बनाइएका हुन्छन्।

सामान्यतया सरकारी कर्मचारी वा मन्त्रीले सित्तैमा पाउने उपहार वा सुविधाले उनीहरूको कार्यसम्पादनमा कुनै स्वार्थ जोडिनु हुँदैन भन्ने मान्यता राखिन्छ। यही कारणले गर्दा साना देखिने उपहारहरू पनि यहाँ ठूलो राजनीतिक चर्चाको विषय बन्ने गर्छन्।