संक्षेपमा
- तीन वर्षपछि रोजगारीको संख्यामा पहिलो पटक वृद्धि।
- औद्योगिक र मर्मत सम्भार क्षेत्रमा धेरै अवसर।
- सेवा र पर्यटन क्षेत्रमा भने अझै रोजगारी घट्दो।
फिनल्यान्डको श्रम बजारमा तीन वर्षको अन्तरालपछि पहिलो पटक सुधारको संकेत देखिएको छ।
फिनल्यान्डको प्रमुख रोजगार विज्ञापन पोर्टल मध्येको एक Duunitori का अनुसार मार्च महिनामा विभिन्न क्षेत्रमा रोजगारीका अवसरहरू उल्लेख्य रूपमा बढेका हुन्।
मार्च महिनामा मात्र ३०,००० भन्दा बढी रोजगारीका विज्ञापनहरू प्रकाशित भएका थिए।
फिनल्यान्डमा बेरोजगारी दर १०.५ प्रतिशत पुगेको अवस्थामा यो वृद्धिलाई सकारात्मक रूपमा लिइएको छ।
Duunitori की लोत्ता भिल्यामाका अनुसार पछिल्लो ट्रेन्डले बजारमा स्पष्ट सुधारको प्रारम्भिक संकेत देखिएको छ। यो वृद्धि आगामी दिनमा पनि कायम रहने अपेक्षा उनले गरिन्।
रोजगार कम्पनी बारोनाका अनुसार विशेषज्ञ पदहरूमा रिक्त स्थान गत वर्षको तुलनामा दोब्बर भएको छ। औद्योगिक क्षेत्रमा पनि करिब ३० प्रतिशत बढी अवसर खुलेका छन्।
औद्योगिक क्षेत्रको सुधारले अन्य क्षेत्रलाई पनि अघि बढाउने अपेक्षा गरिएको छ। फिनल्यान्डको श्रम बजार प्रायः औद्योगिक क्षेत्रबाटै सुध्रिन सुरु हुन्छ।
सबैभन्दा धेरै वृद्धि जडान र मर्मतसम्भारको क्षेत्रमा २१ प्रतिशत देखिएको छ। प्रविधि र औद्योगिक उत्पादनका क्षेत्रमा पनि करिब २० प्रतिशतको वृद्धि देखिएको छ।
तर रेस्टुरेन्ट र पर्यटन जस्ता सेवा क्षेत्रमा भने अझै मन्दी छ। यी क्षेत्रमा कामका विज्ञापनहरू अझै घट्दो क्रममा छन्।
केही विशेषज्ञ पदहरूमा अझै पनि दक्ष कामदारको अभाव देखिएको छ। तर समग्रमा रोजगारी खोज्नेहरूको संख्या उपलब्ध पदहरूभन्दा अझै पनि धेरै छ।
फिनल्यान्डमा औद्योगिक क्षेत्रमा सुधार आउनुलाई अर्थतन्त्र चलायमान हुनुको पहिलो खुड्किलो मानिन्छ। सामान्यतया वसन्त ऋतु सुरु भएसँगै निर्माण र मर्मत सम्भारका कामहरू बढ्ने हुनाले पनि मार्च महिनामा यस्तो उत्साह देखिएको हो।
फिनल्यान्डमा बसोबास गर्ने नेपालीहरूका लागि पनि विशेषगरी प्राविधिक र औद्योगिक क्षेत्रमा नयाँ अवसरहरू सिर्जना हुनु सुखद समाचार हो।
