संक्षेपमा
- आज यो वर्षको अहिलेसम्मकै उच्च तापक्रम हुने प्रक्षेपण।
- लापल्यान्डमा मे महिनाको जस्तो गर्मी महसुस हुने।
- दक्षिणी र मध्य क्षेत्रमा डढेलोको कडा चेतावनी।
फिनल्यान्डमा यो साता अस्वाभाविक रूपमा गर्मी बढ्ने र घमाइलो मौसम रहने मौसमविद्हरूले बताएका छन्। विशेषगरी आज मंगलबार यो वसन्त ऋतुको तापक्रमले नयाँ रेकर्ड राख्ने अनुमान गरिएको छ।
फिनल्यान्डको सार्वजनिक प्रसारक YLE का मौसमविद् एलिआस पाक्कानेनका अनुसार आज देशभरिको तापक्रम सामान्यभन्दा धेरै माथि रहनेछ।
आइतबार उत्तरी फिनल्यान्डका केही क्षेत्रमा तापक्रम १६ डिग्री सेल्सियस नाघेको थियो। यो २०२६ को अहिलेसम्मकै उच्च तापक्रम हो।
उत्तरको लापल्यान्ड क्षेत्रमा अहिले १० देखि १५ डिग्रीको हाराहारीमा तापक्रम देखिएको छ। यस्तो तापक्रम सामान्यतया मे महिनामा मात्र हुने गर्दछ।
फिनल्यान्डमा अहिले शक्तिशाली उच्च चापीय प्रणाली विकसित भएकाले घाम लाग्ने क्रम जारी रहने बताइएको छ।
साताको अन्त्यतिर दक्षिणी र मध्य भागमा बादल लाग्ने र तापक्रम ९ डिग्रीसम्म झर्न सक्ने प्रक्षेपण छ। तर घाम लाग्ने ठाउँमा भने तापक्रम १५ डिग्रीसम्मै रहने अनुमान छ।
सफा आकाशका कारण रातिको समयमा भने चिसो कायमै रहने छ। दक्षिणी र मध्य फिनल्यान्डमा रातको तापक्रम शून्यभन्दा मुनि झर्न सक्नेछ।
गर्मी र सुख्खायाम सुरु भएसँगै डढेलोको जोखिम पनि थपिएको छ। दक्षिण र मध्य क्षेत्रमा यो साताभरि नै डढेलोको चेतावनी लागू गरिएको छ।
फिनल्यान्डमा अप्रिल महिनामा यति धेरै गर्मी हुनुलाई जलवायु परिवर्तनको सङ्केतका रूपमा पनि हेरिन्छ। सामान्यतया यो समयमा हिउँ पग्लिएर हिलो हुने गर्दछ, तर यस वर्ष जमिन चाँडै नै सुख्खा भएको छ।
फिनल्यान्डमा बस्ने नेपाली समुदायका लागि यो समय बाहिर निस्कन र प्रकृतिसँग रमाउन उपयुक्त भए तापनि जङ्गल क्षेत्रमा आगो बाल्दा सावधानी अपनाउनु पर्ने हुन्छ।
आज नेपाली नयाँ वर्ष २०८३ परेको हुँदा फिनल्यान्डमा बस्ने नेपालीहरूका लागि नयाँ वर्ष मनाउन मौसमले निकै साथ दिएको देखिएको छ।
