📺 नेपालीलाइनेनका भिडियोहरू अब YouTube मा हेर्नुहोस्।
▶️ Let's Goसंक्षेपमा
- कुरियरको कमाइ व्यावसायिक नभई तलब मानिने।
- अदालतको फैसला ३–२ को बहुमतले सदर।
- वोल्टमाथि श्रम नियम तुरुन्त पालना गर्न दबाब।
फिनल्यान्डको सर्वोच्च प्रशासनिक अदालत (KHO) ले फुड डेलिभरी कम्पनी वोल्ट (Wolt) को पुनरावेदन खारेज गरिदिएको छ। यो फैसलासँगै अब वोल्टका कुरियरहरूले पाउने रकमलाई ‘व्यावसायिक आय’ नभई ‘तलब’ मानिने निश्चित भएको छ।
यो फैसलाले हेलसिन्की लगायतका सहरमा काम गर्ने हजारौँ कुरियरहरूको अधिकार र सामाजिक सुरक्षामा ठुलो प्रभाव पार्न सक्नेछ।
फिनल्यान्डको फुड डेलिभरी क्षेत्रमा काम गर्ने नेपालीहरूको वास्तविक सङ्ख्या यकिन नभए पनि उच्च रहेको आकलन छ। दिनभरि काम गर्दा पनि थोरै मात्र कमाई हुने भन्दै कुरियरहरूले असन्तुष्टि जनाउँदै आएका छन्।
यो मुद्दा केन्द्रीय कर बोर्डको निर्णयसँग सम्बन्धित थियो। बोर्डले कुरियरको कमाइलाई तलबको रूपमा व्याख्या गरेपछि वोल्टले त्यसविरुद्ध अदालतमा उजुरी दिएको थियो।
अदालतले गत वर्ष नै कुरियरहरूको काम गर्ने प्रकृति रोजगारीको मापदण्डसँग मिल्ने ठहर गरेको थियो। यद्यपि, कुरियरहरूलाई आफ्नो काम गर्ने समय छनोट गर्ने स्वतन्त्रता भने दिइएको छ।
यो पटकको फैसला ३ विरुद्ध २ मतको बहुमतले आएको हो। दुई न्यायाधीश र एक सहजकर्ता भने वोल्ट र कर प्रशासनको पुरानो धारणाकै पक्षमा थिए।
पामले गर्यो स्वागत
मजदुर युनियन ‘पाम’ (PAM) ले अदालतको निर्णयको स्वागत गरेको छ। पामकी अध्यक्ष आन्निका रोन्नी–साल्लिनेनले अब ‘बाहाना बनाउने समय सकिएको’ बताएकी छन्।
उनले श्रम सुरक्षा अधिकारीहरूलाई तुरुन्तै कदम चाल्न माग गरेकी छिन्। हालसम्म कुरियरहरूको अधिकारको अनुगमन नभएको उनको आरोप छ।
वोल्टले भने अदालतको फैसलाको विस्तृत अध्ययन गरिरहेको जानकारी दिएको छ। कम्पनीले फिनल्यान्डमा प्लेटफर्म कामदारसम्बन्धी स्पष्ट कानुन आवश्यक रहेको दाबी गर्दै आएको छ।
वोल्टका अनुसार आर्थिक अनिश्चितताको समयमा लचिलो कमाइको अवसरलाई सीमित गरिनु हुँदैन। अहिले पाम र वोल्टबीच केही निश्चित कामदारहरूको सेवा सर्तबारे वार्ता भइरहेको इल्ता सानोमातले लेखेको छ।
फिनल्यान्डमा वोल्ट, फुडोरा, उबर इट्सजस्ता ‘प्लेटफर्म वर्कर’ को कानुनी हैसियतबारे लामो समयदेखि विवाद चल्दै आएको छ।
युरोपेली युनियनले पनि यस्ता कामदारलाई कर्मचारीको रूपमा मान्यता दिने गरी नयाँ निर्देशिकाहरू ल्याइरहेको छ, जसले गर्दा आगामी दिनमा वोल्ट जस्ता कम्पनीहरूले आफ्ना सबै कुरियरलाई पूर्ण कर्मचारीको सुविधा दिनुपर्ने हुन सक्छ।
नेपालीलाइनेनबाट थप:
निर्मल पुर्जाको मृत्युपछि पूर्व मिस फिनल्यान्डलाई 'हेट मेसेज'को वर्षा, ज्यान मार्ने धम्की
एसडिपीको नयाँ 'आप्रवासी नीति'ले फिनिस राजनीति तरङ्गितः के छ आप्रवासी नेताको मत?
हेलसिन्की-तालिन सुरुङ रेलमार्गको चर्चा फेरी सुरू, निर्माण सम्पन्न भए हुनेछ 'गेम चेन्जर'
समुद्रमा तैरिने सहर: यस्ता छन् फिनल्यान्डमा बनेका संसारकै सबैभन्दा ठुला पानीजहाज
प्रिय पाठक, हाम्रो 'सहयोगी सदस्य' बनी हाम्रो कामलाई सघाउनुहोस्। साथै हाम्रा सबै प्रिमियम सामाग्री पढ्नुहोस्।
