📺 नेपालीलाइनेनका भिडियोहरू अब YouTube मा हेर्नुहोस्।
▶️ Let's Goसंक्षेपमा
- हेलसिन्कीको पासिलामा एकीकृत सरकारी सेवा प्रदान गर्ने ‘सुओमी-पिस्ते’ सञ्चालनमा।
- डिजिटल सेवा प्रयोग गर्न नसक्ने र विदेशबाट आउने आप्रवासीहरूलाई विशेष प्राथमिकता।
- सन् २०३० सम्म देशभरिका सार्वजनिक प्रशासन सेवालाई साझा केन्द्रमा समेट्ने लक्ष्य।
हेलसिन्कीस्थित पासिला कार्यालय केन्द्र अर्थात् Pasilan virastokeskus मा सोमबारदेखि एकीकृत सरकारी सेवा केन्द्र ‘सुओमी-पिस्ते’ (Suomi-piste) सञ्चालनमा आएको छ।
केन्द्रको स्थापनासँगै अब सेवाग्राहीले विभिन्न सरकारी निकायका कामहरू एकै पटक पुरा गर्न सक्नेछन्।
यो सेवा विशेष गरी डिजिटल माध्यम प्रयोग गर्न नचाहने वा नसक्ने ग्राहकहरूका लागि लक्षित गरिएको हो। अर्थ मन्त्रालयका अनुसार केन्द्रमा हप्तामा करिब ३,००० सेवाग्राही आउने अनुमान छ।
हेलसिन्की सुओमी-पिस्तेमा मालपोत कार्यालय र कर प्रशासन (Vero) का सेवाहरू उपलब्ध हुनेछन्। साथै डिजिटल तथा जनसंख्या तथ्याङ्क विभाग (DVV), सामाजिक सुरक्षा पुनरावेदन बोर्ड र अनुमति तथा अनुगमन प्राधिकरण (LVV) पनि यहाँ रहनेछन्।
विदेशबाट राजधानी क्षेत्रमा बसाइँ सरेर आउने आप्रवासीहरूका लागि यहाँ इन्टरनेसनल हाउस हेलसिन्की (IHH) ले पनि सेवा दिनेछ। यसले फिनल्यान्डमा आउने नेपालीहरूका लागि पनि सरकारी प्रकृया बुझ्न र काम सुचारु गर्न सहज बनाउनेछ।
सार्वजनिक प्रशासनका सेवाहरूलाई एकै छानामुनि ल्याउने सरकारको यो आठौँ संयुक्त ग्राहक सेवा केन्द्र हो। फिनल्यान्ड सरकारले सन् २०३० सम्ममा मुलुकका सबै सार्वजनिक सेवाहरूलाई यस्तै साझा केन्द्रमा समेट्ने रणनीति बनाएको छ।
यसअघि फिनल्यान्डका अन्य सहरहरू तुर्कु, योएनसु, लाह्ती, लाप्पेनरान्ता, पोरी, कौभोला र युभास्कुलामा यस्ता सेवा केन्द्रहरू सञ्चालनमा आइसकेका छन्।
यो वर्ष हेलसिन्कीका अतिरिक्त रोभानिएमीमा पनि यस्तै केन्द्र स्थापना गरिँदै छ। यो व्यवस्थाले अनलाइन प्रणालीमा अभ्यस्त नभएका वा नयाँ परिवेशमा भाषागत कठिनाइ भोगिरहेका आप्रवासीहरूलाई प्रत्यक्ष परामर्श लिन ठूलो राहत दिनेछ।
नेपालीलाइनेनबाट थप:
निर्मल पुर्जाको मृत्युपछि पूर्व मिस फिनल्यान्डलाई 'हेट मेसेज'को वर्षा, ज्यान मार्ने धम्की
एसडिपीको नयाँ 'आप्रवासी नीति'ले फिनिस राजनीति तरङ्गितः के छ आप्रवासी नेताको मत?
हेलसिन्की-तालिन सुरुङ रेलमार्गको चर्चा फेरी सुरू, निर्माण सम्पन्न भए हुनेछ 'गेम चेन्जर'
समुद्रमा तैरिने सहर: यस्ता छन् फिनल्यान्डमा बनेका संसारकै सबैभन्दा ठुला पानीजहाज
प्रिय पाठक, हाम्रो 'सहयोगी सदस्य' बनी हाम्रो कामलाई सघाउनुहोस्। साथै हाम्रा सबै प्रिमियम सामाग्री पढ्नुहोस्।
