📺 नेपालीलाइनेनका भिडियोहरू अब YouTube मा हेर्नुहोस्।
▶️ Let's Goसंक्षेपमा
- १२ प्रकारका क्यान्सरमा फिनल्यान्डको उपचार दर नर्डिक क्षेत्रमै पुछारमा।
- ढिलो स्वास्थ्य परीक्षण र आधुनिक औषधिको सीमित प्रयोगले मृत्युदर बढेको दाबी।
- स्वास्थ्य मन्त्रालयद्वारा प्राथमिक स्वास्थ्य सेवामा लामो पर्खाइको समय स्वीकार।
फिनल्यान्डको सार्वजनिक प्रसारक Yle को खोजमूलक पत्रकारिता एकाइ MOT ले गरेको नयाँ अनुसन्धानले फिनल्यान्डमा क्यान्सरका बिरामीहरूको मृत्यु अन्य नर्डिक देशहरूको तुलनामा चाँडो हुने देखाएको छ।
यो अनुसन्धान विशेषगरी पुरुषहरूमा लाग्ने विभिन्न १२ प्रकारका क्यान्सरहरूको उपचार र नतिजामा केन्द्रित छ।
नर्डिक देशहरूमा ४१ प्रमुख क्यान्सरहरूको अवस्था, मृत्युदर, व्यापकता र बाँच्ने दर सम्बन्धी तथ्याङ्क राख्ने एजेन्सी Nordcan को तथ्याङ्क अनुसार फिनल्यान्डमा फोक्सो, आन्द्रा र मलाशयको क्यान्सर भएका बिरामीहरूको बाँच्ने दर निकै कम छ।
साथै स्तन र प्रोस्टेट क्यान्सरको उपचार राम्रो भए पनि फोक्सोको क्यान्सरमा फिनल्यान्ड धेरै पछाडि देखिएको छ।
तुर्कु विश्वविद्यालयका प्रोफेसर आन्ती येकुनेनले यो अवस्थालाई चिन्ताजनक बताएका छन्। उनका अनुसार उपचारको गुणस्तरमा नर्डिक मुलुकहरू बीचको यो अन्तरले ठुलो प्रश्न खडा गरेको छ।
हेलसिन्की विश्वविद्यालयको अध्ययनले फिनल्यान्डका मानिसहरू स्वास्थ्य जाँचका लागि ढिलो जाने गरेको देखाउँछ। अन्य देशको तुलनामा यहाँ रोगको सुरुवाती चरणमा गरिने इमेजिङ परीक्षणहरू पनि कम हुने गरेका छन्।
पूर्वी फिनल्यान्ड विश्वविद्यालयको एक शोधले यहाँ फोक्सोको क्यान्सर फैलिएपछि मात्र पत्ता लाग्ने गरेको तथ्य फेला पारेको छ। यस्तो अवस्थामा शल्यक्रिया गर्न असम्भव हुने भएकाले बिरामीको मृत्यु चाँडो हुने गरेको हो।
तुर्कु विश्वविद्यालय अस्पतालकी विशेषज्ञ मारिया सिल्भोवियेमीले ढिलो परीक्षण र उपचारले रोग झनै जटिल बन्ने बताइन्।
वैज्ञानिक रूपमा पुष्टि गर्न गाह्रो भए पनि फिनल्यान्डमा बिरामीहरू उपचार खोज्न ढिलाइ गर्छन् भन्ने बहस डाक्टरहरू बीच चल्ने गर्छ।
महँगा औषधिको प्रयोग कम
फिनल्यान्डमा नयाँ ‘इम्युनो-अन्कोलोजी’ औषधिहरूको प्रयोग अन्य युरोपेली देशहरूको तुलनामा कम छ। यी औषधिहरू निकै महँगा हुने भएकाले डाक्टरहरूले यिनको प्रयोगमा सावधानी अपनाउने गरेको जनाइएको छ।
गत वर्ष फिनल्यान्डले उपचारको गुणस्तर सुधार्न राष्ट्रिय क्यान्सर रणनीति सार्वजनिक गरेको थियो।
प्रोफेसर येकुनेनले क्यान्सर बिरामीको आयु थप्न समाजले कति खर्च गर्ने भन्ने कुरा सरकारले नै स्पष्ट तोक्नुपर्ने सुझाव दिए।
स्वास्थ्य मन्त्रालयका निर्देशकहरूले प्राथमिक स्वास्थ्य सेवामा पर्खाइको समय लामो रहेको स्वीकार गरेका छन्। उनीहरूले बिरामी स्वयंले पनि समयमै उपचार खोज्नुपर्ने र स्वस्थ जीवनशैली अपनाउनुपर्नेमा जोड दिए।
यी देशहरू बीचको तुलनात्मक अध्ययनले स्वास्थ्य सेवाको स्तर कायम राख्न मद्दत पुग्छ। फिनल्यान्डमा पछिल्लो समय स्वास्थ्य बजेट र आधुनिक औषधिको न्यायोचित वितरणका बारेमा ठुलो बहस सुरु भएको छ।
नर्डिक देशहरू (नर्वे, स्विडेन, डेनमार्क, आइसल्यान्ड र फिनल्यान्ड) विश्वकै उत्कृष्ट स्वास्थ्य सेवाका लागि प्रख्यात मानिन्छन्।
नेपालीलाइनेनबाट थप:
निर्मल पुर्जाको मृत्युपछि पूर्व मिस फिनल्यान्डलाई 'हेट मेसेज'को वर्षा, ज्यान मार्ने धम्की
एसडिपीको नयाँ 'आप्रवासी नीति'ले फिनिस राजनीति तरङ्गितः के छ आप्रवासी नेताको मत?
हेलसिन्की-तालिन सुरुङ रेलमार्गको चर्चा फेरी सुरू, निर्माण सम्पन्न भए हुनेछ 'गेम चेन्जर'
समुद्रमा तैरिने सहर: यस्ता छन् फिनल्यान्डमा बनेका संसारकै सबैभन्दा ठुला पानीजहाज
प्रिय पाठक, हाम्रो 'सहयोगी सदस्य' बनी हाम्रो कामलाई सघाउनुहोस्। साथै हाम्रा सबै प्रिमियम सामाग्री पढ्नुहोस्।
