फिनल्यान्डको अर्थ मन्त्रालयले सोमबार सार्वजनिक गरेको नयाँ आर्थिक प्रक्षेपण अनुसार फिनल्यान्ड लामो मन्दीबाट बिस्तारै बाहिर निस्कने छ। यद्यपी सुधारको गति सुस्त रहने देखिएको छ।
आगामी तीन वर्षमा सामान्य आर्थिक वृद्धि हुने अनुमान गरिए पनि कमजोर रोजगारी बजार र विभिन्न अनिश्चितताहरूले पुनरुत्थानमा बाधा पुऱ्याउन सक्नेछन्।
अर्थ मन्त्रालयका अनुसार यस वर्ष फिनल्यान्डको कुल गार्हस्थ्य उत्पादन (GDP) करिब १.० प्रतिशतले बढ्नेछ। आगामी वर्ष सन् २०२६ मा १.४ प्रतिशत र सन् २०२७ मा १.७ प्रतिशतको वृद्धि हुने अनुमान छ।
“हामी फिनल्यान्डको अर्थतन्त्र सुधार हुने अपेक्षा गर्छौं, तर धेरै अनिश्चितताहरू पनि छन्,” मन्त्रालयका यान्ने हुओभारीले पत्रकार सम्मेलनमा भने।
उच्च बेरोजगारी दर र सरकारको खर्च कटौतीको नीतिले उपभोक्ताको विश्वासमा असर पारेको छ, जसले गर्दा मानिसहरूले अतिरिक्त आम्दानी उपभोग गर्नुको सट्टा बचत गर्न थालेका छन्।
उच्च बेरोजगारी दर र सरकारको खर्च कटौतीको नीतिले उपभोक्ताको विश्वासमा असर पारेको छ, जसले गर्दा मानिसहरूले अतिरिक्त आम्दानी उपभोग गर्नुको सट्टा बचत गर्न थालेका छन्।
आर्थिक वृद्धिले रोजगारीको अवस्थामा तत्काल सुधार ल्याउन सकेको छैन, जुन फिनल्यान्डमा बसोबास गरिरहेका आप्रवासी समुदायका लागि समेत चासोको विषय हो।
गत समरमा प्रकाशित एक रिपोर्टका अनुसार फिनल्यान्डको बेरोजगारी दर युरोपेली संघमा दोस्रो उच्च थियो।
मन्त्रालयले आप्रवासन र सरकारका नीतिहरूका कारण श्रम शक्ति बढेको स्वीकार गरेको छ।
“बजारमा कमजोर मागका कारण श्रम शक्तिमा भएको वृद्धिले हाल बेरोजगारी झनै बढाएको देखिएको छ।” प्रतिवेदनमा भनिएको छ।
यद्यपि अर्थतन्त्रमा सुधार हुँदै जाँदा बेरोजगारी घट्ने मन्त्रालयको विश्वास छ। आगामी वर्ष बेरोजगारी दर घटेर ९ प्रतिशतमा पुग्ने प्रक्षेपण गरिएको छ।
सरकारका लागि अर्को ठूलो चिन्ता सार्वजनिक ऋण हो। प्रधानमन्त्री पेत्तेरी ओर्पोको सरकारले ऋण अनुपातलाई स्थिर बनाउने लक्ष्य राखेको थियो। तर मन्त्रालयको प्रक्षेपण अनुसार सन् २०२७ मा ऋण अनुपात अस्थायी रूपमा स्थिर भए पनि त्यसपछि फेरि बढ्न सुरु गर्नेछ।
विश्वव्यापी आर्थिक अनिश्चितताले पनि फिनल्यान्डको वृद्धिलाई असर गर्नेछ। अमेरिकी व्यापार नीति र युरोको मूल्य वृद्धिले फिनिस निर्यातमा बाधा पुऱ्याइरहेको छ, यद्यपि युरो क्षेत्रको सुधारले केही सहयोग गरेको छ।
