📺 नेपालीलाइनेनका भिडियोहरू अब YouTube मा हेर्नुहोस्।
▶️ Let's Go…संक्षेपमा.
- अनलाइन पत्रिकाको नाम नेपालीलाइनेन राखिएको छ।
- निकट भविष्यमा Job Vacancies पेज र डिजिटल लाइब्रेरी पनि सञ्चालन गरिने।
- फिनल्यान्डमा बस्ने नेपालीको सङ्ख्या ११,००० नाघे पनि अहिलेसम्म नेपाली पत्रिका थिएन।
हेलसिंकी, १ वैशाख २०८२ (१४ अप्रिल २०२५) – नेपाली नयाँ वर्ष २०८२ को अवसर पारेर फिनल्यान्डमा नेपाली समुदाय लक्षित नेपालीलाइनेन अनलाइन पत्रिका सुरु भएको छ। करिब १ वर्षको आन्तरिक तयारी पछि वैशाख १ कै दिन पारि नेपालीलाइनेन अनलाइन पत्रिकाको औपचारिक आरम्भ गरिएको हो। फिनल्यान्डको हेलसिंकीमा रहेको मिडिया र आमसञ्चार क्षेत्रमा काम गर्ने टाकुरा कम्युनिकेशन्स एण्ड पब्लिशिङ कम्पनीले नेपालीलाइनेन अनलाइन पत्रिका प्रकाशन थालेको हो।
करिब ११,००० नेपालीहरू बसोबास गर्ने फिनल्यान्डमा अहिलेसम्म नेपाली भाषाको अनलाइन पत्रिका थिएन। नेपालीलाइनेन पत्रिकामा फिनल्यान्ड र नेपालसँग सम्बन्धित समसामयिक समाचारहरू, सरकारी नीति तथा नियमहरूको विश्लेषण साथै शैक्षिक र रोजगारीका अवसरहरू बारे जानकारी रहने प्रकाशक टाकुराले जनाएको छ।
पछिल्लो तथ्याङ्क अनुसार फिनल्यान्डमा बसोबास गर्ने नेपाली मूलका व्यक्तिहरूको सङ्ख्या ११,००० कटेको छ।
नेपालीलाइनेनलाई सञ्चार र अनुसन्धानमा एक दशकभन्दा बढी अनुभव भएका मिडिया पेसाकर्मीहरू तथा अनुसन्धानकर्ताहरूले सञ्चालन गरेका हुन्। नेपालीलाइनेनले फिनल्यान्डको आम सञ्चार परिषद् (JSN) द्वारा निर्देशित पत्रकारिता सिद्धान्तहरूको पालना गर्ने र उच्च मिडिया नैतिकता र आचारसंहिता अनुरूप काम गर्ने प्रतिबद्धता व्यक्त गरेको छ। नेपालीलाइनेनका सामाग्रीहरू मूलतः नेपाली भाषामा प्रकाशित हुने भए पनि फिनिश र अङ्ग्रेजी भाषामा समेत आवश्यकता बमोजिम समाचार र लेखहरू प्रकाशन हुनेछन्।
पत्रिकाका नियमित समाचारहरू सबै पाठकहरूलाई उपलब्ध भए पनि विशेष रिपोर्टहरू भने नेपालीलाइनेनका सहयोगी सदस्यका लागि मात्र उपलब्ध हुनेछन्। न्यूनतम मासिक ४.९९ युरो तिरी पत्रिकाको ‘सहयोगी सदस्य’ बन्न सकिने प्रावधान छ। सहयोगी सदस्यका लागि प्रिमियम स्टोरिज, प्रिमियम अडियोहरू, प्रिमियम भिडियोहरू, र इभेन्ट क्यालेन्डर लगायतका सामाग्रीमा पहुँच हुनेछ। नेपालीलाइनेनले निकट भविष्यमा काम खोज्नेहरूका लागि विज्ञापन (job vacancies) सेवा र नेपालीलाइनेन डिजिटल लाइब्रेरी पनि स्थापना गर्ने जनाएको छ।
Statistics Finland को पछिल्लो तथ्याङ्क अनुसार फिनल्यान्डमा बसोबास गर्ने नेपाली मूलका व्यक्तिहरूको सङ्ख्या ११,००० कटेको छ। सन् १९९० मा जम्मा १५ जना नेपाली नागरिकहरू फिनल्यान्डमा रहेको कुरा फिनिश सरकारी तथ्याङ्कमा उल्लेख छ। सो सङ्ख्या बढ्दै सन् २००० मा ९८, सन् २०१० मा ११३३ हुँदै सन् २०२० सम्म आउँदा ४००० नाघेको देखिन्छ। पछिल्लो समय पढ्न र काम गर्न फिनल्यान्ड आउने नेपालीहरूको सङ्ख्या बढ्दै गएको छ।
नेपालीलाइनेनबाट थप:
निर्मल पुर्जाको मृत्युपछि पूर्व मिस फिनल्यान्डलाई 'हेट मेसेज'को वर्षा, ज्यान मार्ने धम्की
एसडिपीको नयाँ 'आप्रवासी नीति'ले फिनिस राजनीति तरङ्गितः के छ आप्रवासी नेताको मत?
हेलसिन्की-तालिन सुरुङ रेलमार्गको चर्चा फेरी सुरू, निर्माण सम्पन्न भए हुनेछ 'गेम चेन्जर'
समुद्रमा तैरिने सहर: यस्ता छन् फिनल्यान्डमा बनेका संसारकै सबैभन्दा ठुला पानीजहाज
प्रिय पाठक, हाम्रो 'सहयोगी सदस्य' बनी हाम्रो कामलाई सघाउनुहोस्। साथै हाम्रा सबै प्रिमियम सामाग्री पढ्नुहोस्।
