भयो फिनल्यान्डमा कहिल्यै नभएको कामः गाँउले र एक डाक्टर मिलेर खोले आफ्नै स्वास्थ्य केन्द्र

(प्रिय पाठक, यो नेपालीलाइनेनका सहयोगी सदस्यहरूले मात्र पढ्न मिल्ने ‘प्रिमियम स्टोरी’ हो। ‘सहयोगी सदस्य’ बनी हामीलाई सघाउनु भएकोमा धेरै-धेरै धन्यवाद।)

विज्ञापन

प्रिय पाठक, कृपया हाम्रो 'सहयोगी सदस्य' बनी हामीलाई सघाउनुहोस्।

€59/वर्ष · मासिक 4.92€ अगाडि बढ्नुहोस् →

Pay

Pay

MobilePay

Bank Transfer

फिनल्यान्डको कार्यालोहयामा बन्द भइसकेको स्वास्थ्य केन्द्र स्थानीय बासिन्दा र एक साहसी डाक्टरको पहलमा फेरि खुलेको छ। यो समाचार अहिले फिनल्यान्डका सबैजसो मिडियामा प्रमुखकताका साथ आइरहेको छ।

लान्सी उसिमा कल्याणकारी क्षेत्रले बजेट अभावमा बन्द गरेको यो केन्द्र अब एक नयाँ र नौलो मोडेलमा सञ्चालन हुनेछ।

मे महिनाको सुरुवातमै खुलेको यस केन्द्रमा बिरामीको चाप निकै देखिएको छ। यहाँका बासिन्दाहरू आफ्नो गाउँमै स्वास्थ्य सेवा पाउँदा निकै खुसी छन्।

डाक्टर अक्रामी मामुरखोन त्यहाँका गाउँलेका लागि परिचित नाम हुन्। उनी विदेशी मुलका डाक्टर हुन्। वृद्धवृद्धाहरूलाई सहरसम्म जान गाह्रो हुने भएकाले सेवा नजिक हुनुपर्ने उनको तर्क छ।

कार्यालोहयाबाट लोहया सहरको केन्द्र पुग्न कारमा आधा घण्टा लाग्छ। सार्वजनिक यातायात प्रयोग गर्दा झन्डै आधा दिन खर्च हुने गर्छ।

किने जम्मा १ युरोमा भवन

स्थानीय टोल सुधार समिति (Kyläyhdistys) ले लोहया सहरबाट स्वास्थ्य केन्द्रको भवन मात्र एक युरोमा किन्ने सहमति गरेको छ। यो भवन अब समितिको स्वामित्वमा रहनेछ।

समितिले यो भवन डाक्टर मामुरखोनलाई भाडामा दिनेछ। डाक्टरले आफ्नो सेवा कल्याणकारी क्षेत्रलाई बिक्री गर्नेछन्।

फिनल्यान्डमा यस्तो मोडेल पहिलो पटक प्रयोग गरिएको हो। बेलायत, डेनमार्क र नर्वे जस्ता देशमा यस्ता अभ्यास सफल मानिन्छन्।

लान्सी उसिमाका सरकारी अधिकारीहरुका अनुसार यो मोडेल अन्य साना ठाउँमा पनि लागू गर्न सकिन्छ। कानुन अलि सहज भए यस्ता उद्यमी डाक्टरहरू थपिने उनीहरूको विश्वास छ।

समितिका अध्यक्ष युस्सी लेप्पानेनले यो सफलताका लागि निकै लामो संघर्ष गर्नुपरेको स्थानीय मिडियालाई दिएको प्रतिक्रियामा बताएका छन्। उनका अनुसार गाउँलेहरूले यो क्षणको प्रतीक्षा निकै लामो समयदेखि गरिरहेका थिए।

यो स्वास्थ्य केन्द्र हप्ताको पाँचै दिन खुल्नेछ। सरकारी केन्द्रहरू समरमा बन्द हुने गरे पनि डाक्टर मामुरखोनले यसलाई सधैं खुला राख्ने योजना बनाएको सार्वजनिक प्रकाशक YLE ले आफ्नो रिपोर्टमा लेखेको छ।

भविष्यमा दन्त चिकित्सक र खुट्टाको उपचार गर्ने विशेषज्ञ पनि ल्याउने तयारी छ। यसले गर्दा गाउँको चहलपहल र सुविधा दुवै बढ्नेछ।

फिनल्यान्डमा पछिल्लो समय स्वास्थ्य सेवाको पुनर्संरचना (Sote-uudistus) पछि धेरै ग्रामीण क्षेत्रका स्वास्थ्य केन्द्रहरू बन्द भइरहेका छन्। कार्यालोहयाको यो “एक युरो” मोडेलले अन्य साना गाउँहरूलाई पनि आफ्नो स्थानीय सेवा जोगाउन नयाँ बाटो देखाएको छ। यसले सरकारी संयन्त्रमा मात्र भर नपरी नागरिक र निजी क्षेत्र मिलेर पनि आधारभूत सेवा सञ्चालन गर्न सकिन्छ भन्ने उदाहरण दिएको छ।