📺 नेपालीलाइनेनका भिडियोहरू अब YouTube मा हेर्नुहोस्।
▶️ Let's Go.संक्षेपमा.
- लोकल ट्रेनमा एक जोडीद्वारा अन्य यात्रुका अगाडि निर्लज्ज यौन क्रियाकलाप।
- VR ले घटनाप्रति दुःख व्यक्त गर्दै छानबिन थाल्यो।
- सार्वजनिक यौन क्रियाकलापले अरूलाई असर गरेमा हुन सक्छ ६ महिनासम्म जेल सजाय।
गत आइतबार साँझ हेलसिन्कीको एक लोकल ट्रेनमा एक जोडीले अन्य यात्रुको अगाडि यौन क्रियाकलाप गरेको घटना सार्वजनिक भएको छ। राष्ट्रिय रेलसेवा VR ले घटनाको अनुसन्धान भइरहेको र यस्तो व्यवहार अस्वीकार्य भएको बताएको छ।
गत आइतबार, अगस्ट ३१ को राति करिब ९ बजे Oulunkylä तर्फ गइरहेको ट्रेनमा उक्त घटना भएको हो। एक प्रत्यक्षदर्शीले MTV समाचारलाई बताएअनुसार एक पुरुष र महिलाले अन्य यात्रुको परवाह नगरी निर्लज्ज रूपमा यौन क्रियाकलाप गरेका थिए।
प्रत्यक्षदर्शीका अनुसार ती जोडी मादक पदार्थले मातिएको जस्तो देखिन्थे। उनीहरूलाई अन्य यात्रुहरूले हेरिरहेकोमा कुनै वास्ता थिएन। MTV ले उक्त घटनाको भिडियो क्लिप पनि हेरेको जनाएको छ।
फिनल्यान्डको राष्ट्रिय रेलसेवा VR ले यस्ता घटना अत्यन्तै दुर्लभ हुने बताएको छ।
“हामीलाई यो घटनाबारे पहिले जानकारी थिएन, तर अहिले यसबारे अनुसन्धान भइरहेको छ।” VR को सञ्चार विभागले एक विज्ञप्तिमा भनेको छ। “यात्रुहरूले यस्तो अनुचित व्यवहारको सामना गर्नुपरेकोमा हामी साँच्चै दुःखी छौं।”
कम्पनीका अनुसार लोकल ट्रेन, स्टेसन र प्लेटफर्म क्षेत्रहरूमा क्यामेरा निगरानी हुन्छ। यस्तो अनुचित व्यवहार गर्ने यात्रुलाई ट्रेनबाट बाहिर निकालिन सकिन्छ।
VR ले यात्रुहरूलाई कुनै पनि प्रकारको असहज वा आपत्तिजनक गतिविधि देखेमा तुरुन्त रिपोर्ट गर्न आग्रह गरेको छ। ट्रेनको डिब्बाहरूमा रहेको आपतकालीन फोनमार्फत चालकलाई वा VR को सुरक्षा केन्द्रमा सिधै सम्पर्क गर्न सकिन्छ।
गम्भीर अवस्थामा भने फिनल्यान्डको आपतकालीन नम्बर ११२ मा फोन गर्न सल्लाह दिइएको छ।
फिनल्यान्डको कानुनअनुसार सार्वजनिक स्थानमा यौनसम्पर्क गर्नु आफैँमा गैरकानुनी होइन। तर यदि अन्य व्यक्तिहरूले आफ्नो इच्छाविपरीत यो घटना देख्न बाध्य हुन्छन् भने यो दण्डनीय अपराध मानिन्छ।
यसलाई फौजदारी संहितामा ‘यौन नैतिकताको उल्लङ्घन’ भनिन्छ। यस्तो अपराध प्रमाणित भएमा जरिवाना वा छ महिनासम्म कैद सजाय हुन सक्छ।
नेपालीलाइनेनबाट थप:
निर्मल पुर्जाको मृत्युपछि पूर्व मिस फिनल्यान्डलाई 'हेट मेसेज'को वर्षा, ज्यान मार्ने धम्की
एसडिपीको नयाँ 'आप्रवासी नीति'ले फिनिस राजनीति तरङ्गितः के छ आप्रवासी नेताको मत?
हेलसिन्की-तालिन सुरुङ रेलमार्गको चर्चा फेरी सुरू, निर्माण सम्पन्न भए हुनेछ 'गेम चेन्जर'
समुद्रमा तैरिने सहर: यस्ता छन् फिनल्यान्डमा बनेका संसारकै सबैभन्दा ठुला पानीजहाज
प्रिय पाठक, हाम्रो 'सहयोगी सदस्य' बनी हाम्रो कामलाई सघाउनुहोस्। साथै हाम्रा सबै प्रिमियम सामाग्री पढ्नुहोस्।
