यो प्रिमियम सामाग्री हाम्रा सहयोगी सदस्यका लागि मात्र।
नेपालीलाइनेनमा प्रकाशित यो सामाग्री 'प्रिमियम' हो। यदि हाम्रो 'सहयोगी सदस्य' बनिसक्नु भएको छ भने गुगल एकाउन्ट वा इमेल प्रयोग गरी लगिन गर्नुहोस्।
'सहयोगी सदस्य' बनिसक्नुभएको छैन भने प्रिमियम सामाग्रीहरु पढ्न 'सहयोगी सदस्य' बन्नुहोस्। सदस्यता दस्तुर मासिक ४.९१ युरो, वार्षिक ५९ युरो।
(प्रिय पाठक, यो नेपालीलाइनेनका सहयोगी सदस्यहरूले मात्र पढ्न मिल्ने ‘प्रिमियम स्टोरी’ हो। ‘सहयोगी सदस्य’ बनी हामीलाई सघाउनु भएकोमा धेरै-धेरै धन्यवाद।)
संक्षेपमा
- ११ वर्षीया बालिकाको नेतृत्वमा आपराधिक समूह।
- कुटपिटसहित ३० वटा अपराधको आशंका।
- १५ वर्षमुनिका कारण आपराधिक दायित्वबाट मुक्त।
हेलसिन्कीको भुओसारी क्षेत्रमा विगत केही समयदेखि सर्वसाधारणलाई दुःख दिइरहेका किशोरीहरूको समूहकी नाइके मात्र ११ वर्षकी बालिका भएको खुलेको छ।
हेलसिन्की सानोमातका अनुसार यी बालिका पूर्वी हेलसिन्कीका बालबालिकाहरूमाझ निकै परिचित छिन्।
समूहमा रहेका करिब १० जना बालिकाहरू अपरिचित व्यक्तिहरूमाथि कुटपिट गरेको आशंकामा तानिएका छन्। उनीहरूमाथि कुटपिट, गैरकानूनी धम्की, मानहानि र तोडफोडसहित करिब ३० वटा अपराधको शंका गरिएको छ।
गत नोभेम्बरमा पनि यस्तै समूहले बाटो हिँड्नेलाई सताएको समाचार स्थानीय पत्रिकाले लेखेका थिए। प्रहरीका अनुसार अहिले फेरि तिनै व्यक्तिहरू यस्ता गतिविधिमा संलग्न भएका हुन्।
प्रहरीले अहिले उक्त समूहलाई फेला पारेर घटनाको सोधपुछ सुरु गरिसकेको छ। तर १५ वर्षभन्दा कम उमेरका भएकाले उनीहरू कानुनी रूपमा आपराधिक दायित्वबाट भने मुक्त हुनेछन्।
फिनल्यान्डको कानुन अनुसार १५ वर्षभन्दा कम उमेरका बालबालिकाहरूलाई अदालतमा मुद्दा चलाउन वा जेल सजाय दिन मिल्दैन। उनीहरूले कुनै अपराध गरेमा प्रहरीले अनुसन्धान गरे पनि कानुनी सजायको सट्टा ‘बालबालिका संरक्षण’ विभागको जिम्मा लगाइन्छ।
त्यसैले प्रहरीले अहिले यो घटनामा पनि बालबालिका संरक्षण केन्द्र र उनीहरूका अभिभावकसँग मिलेर काम गरिरहेको जनाएको छ।
बालबालिका संरक्षण केन्द्रले बालबालिका र परिवारको अवस्था हेरेर परामर्श दिने वा आवश्यक सहयोग गर्ने गर्छ। अवस्था गम्भीर देखिएमा बालबालिकालाई परिवारबाट अलग गरेर सुरक्षित आवास (Foster care) मा समेत राख्ने अधिकार उक्त केन्द्रलाई हुन्छ।
अधिकारीहरूको हस्तक्षेपपछि भुओसारीको अवस्था अहिले सामान्य बन्दै गएको छ।
समस्या फिनिस र आप्रवासी दुवै पृष्ठभूमिका बालबालिकाहरूमा देखिएको छ।
किशोरीका बाबु भन्छन्: पहिले उ आफैँ पीडित थिई
किशोरीका बाबुका अनुसार उनकी छोरीमा गम्भीर समस्या देखिएको करिब एक वर्ष भयो। छोरीमा यो हिंस्रक व्यवहारको सुरुवात जब उनी आफैँ एक वर्षभन्दा बढी समयसम्म दुर्व्यवहार (बुलिङ) को सिकार भइन्, त्यसपछि भएको हो।
उनी दुर्व्यवहारको शिकार भएको कुरा स्वतन्त्र स्रोतबाट पुष्टि भने गर्न नसकेको Yle लगायतका स्थानीय मिडियाले लेखेका छन्।
बाबुका अनुसार अरूले हेप्ने, लात्ती हान्ने र भिडियो खिच्ने जस्ता हर्कतहरूबाट किशोरी पिडित थिइन्। एकपटक त उनलाई क्लाइम्बिङ फ्रेम (खेल्ने ठाउँ) बाट खसालिएको पनि थियो।
“त्यो घटना हुनुभन्दा अघि ऊ निकै मिलनसार र सबैकी प्यारी थिई,” उनले भनेका छन्। “दुर्भाग्यवश, जो आफैँ पीडित थिई, ऊ पछि गएर आफैँ अरूलाई सताउने भई।”
छोरीले गरेका केही कामहरू निकै डरलाग्दा छन् भन्ने कुरा बाबु आफैँ पनि स्वीकार्छन्। उनका अनुसार छोरीले आफूले भोगेको त्यो दुर्व्यवहारबारे अहिले पनि धेरै कुरा खोल्न मान्दिनन्।
अन्य क्षेत्रमा पनि छन् समस्या
हेलसिन्की नगरपालिकाका अनुसार राजधानीका ६–७ वटा यस्ता क्षेत्रहरू छन्, जहाँका बालबालिका र युवाहरूको अवस्थालाई लिएर नगरपालिका प्रशासन निकै चिन्तित छ।
अन्य क्षेत्रको तुलनामा भुओसारीको अवस्था मिडियामा बढी चर्चामा आएको छ, जसले गर्दा त्यहाँको समस्या सुध्रिनुको साटो झनै बिग्रिरहेको नगरपालिको आकलन छ।
भुआसारी क्षेत्रबाट दर्ता भएका करिब ३० वटा प्रहरी उजुरीहरूमा सामान्य कुटपिट (जस्तै: हिर्काउने, तान्ने वा लात्ती हान्ने) वा सामान्य किसिमका दुर्व्यवहार (जस्तै: गालीगलौज गर्ने, थुक्ने वा धम्की दिने) जस्ता घटनाहरू समावेश छन्।
पीडित केटीहरूले आफूले नचिनेका मानिसहरू वा बालबालिकाबाट मात्र नभई, आफूलाई चिनेका मानिसहरूबाट पनि यस्तो व्यवहार भोग्नुपरेको छ।
हेलसिन्की नगरपालिकाकी बाल तथा परिवार कल्याण विभागकी निर्देशक साइला नुम्मिकोस्कीका अनुसार यो समस्या फिनिस र आप्रवासी दुवै पृष्ठभूमिका बालबालिकाहरूमा देखिएको छ।
उनका अनुसार यी घटनामा बालबालिकाहरूले आफ्नो मनको आक्रोश वा रिस नचिनेका मानिसहरूमाथि पोख्ने गरेका हुन्।
“यी बालबालिकाहरूलाई समाजको सुरक्षा र साथको खाँचो छ। उनीहरूलाई यसरी सार्वजनिक रूपमा बदनाम गर्ने वा निशाना बनाउने काम गर्नु हुँदैन,” उनले भनेकी छन्।
