फिनल्यान्डका नेपालीको रुचि र चासो: यी हुन् गत वर्ष नेपालीलाइनेनमा पढिएका टप १० समाचार

(प्रिय पाठक, यो नेपालीलाइनेनका सहयोगी सदस्यहरूले मात्र पढ्न मिल्ने ‘प्रिमियम स्टोरी’ हो। ‘सहयोगी सदस्य’ बनी हामीलाई सघाउनु भएकोमा धेरै-धेरै धन्यवाद।)

गत अप्रिल महिनाको मध्येदेखि प्रकाशन सुरु गरेको नेपालीलाइनेनले विगत आठ महिनामा विभिन्न विषयमा समाचार लेख्यो। नेपालीलाइनेनको यो यात्रामा विभिन्न कठिनाइ र अवरोधहरू त आए नै, तर त्यो भन्दा कैयौँ गुना धेरै पाठकको माया, विश्वास, सद्भाव र सहयोग प्राप्त भयो।

नेपालीलाइनेनका मुख्य पाठकहरू (करिब ९०%) फिनल्यान्डका नेपालीहरू नै हुन्। फिनल्यान्ड पछि नेपालीलाइनेन धेरै पढिने देशहरूमा नेपाल, अमेरिका, स्विडेन, युके, क्यानडा, जापान, अस्ट्रेलिया, बेल्जियम, डेनमार्क र नर्वे रहेका छन्।

वेबसाइट र फेसबुकका अलावा नेपालीलाइनेनका समाचार एकदमै धेरै टिकटकमा पनि पढिन्छन्। नेपालीलाइनेनको एउटा समाचार त टिकटकमा करिब सात लाख पटक हेरिएको छ। लाख भन्दा धेरै पटक हेरिएका समाचारहरू कैयौँ छन्।

फिनल्यान्डमा बसोबास गर्ने नेपालीहरूको मुख्य चासो र रुचि कुन-कुन विषयमा छ भन्ने गत वर्ष नेपालीलाइनेनमा सबैभन्दा धेरै पढिएका समाचारहरूको तथ्याङ्कले थोरै भए पनि प्रतिबिम्बित गर्छ।

हाम्रो तथ्याङ्कले भन्छः फिनल्यान्डमा बस्ने नेपालीहरूको मुख्य चासो श्रम शोषण, मानव तस्करी, परामर्श कम्पनीहरूको धोकाधडी, र विद्यार्थी अधिकारमा केन्द्रित देखिन्छ।

प्रस्तुत छ नेपालीलाइनेन वेबसाइटमा गत वर्ष सबैभन्दा धेरै हेरिएका मुख्य १० समाचारको विवरणः

नम्बर दश (10): भद्रकाली कन्सल्टेन्सीले समाचार हटाउन दबाब दिएको खबर

काठमाडौँको भद्रकाली कन्सल्टेन्सीले नेपालीलाइनेनलाई आफ्नो बारेमा प्रकाशित समाचार हटाउन दबाब र धम्की दिएको विषयमा समाचार प्रकाशित भएको थियो। उक्त कन्सल्टेन्सीसँग सम्बन्धित व्यक्तिहरूले नेपालीलाइनेनलाई समाचार डिलिट नगरे नेपाल डिपोर्ट गराउने धम्की समेत दिएका थिए। डायस्पोरामा बसेर गरिने पत्रकारिता र सत्य समाचार प्रकाशनमा आउने चुनौतीहरूलाई उजागर गरेको उक्त समाचार नेपालीलाइनेनमा धेरै पढिएका मध्ये एउटा समाचार बन्यो।

नम्बर नौ (9): माल्मीमा १४ वर्षीय बालकको हत्या प्रयास बारेको समाचार

गत डिसेम्बर २१ मा हेलसिन्कीको माल्मी क्षेत्रमा एक १४ वर्षीय बालकमाथि चक्कु प्रहार भएको घटना बारेको समाचार पनि छोटो समयमा धेरै पढिएको थियो। प्रहरीका अनुसार घटनाका अभियुक्त पनि १४ वर्षे किशोर नै थिए। हाल प्रहरी अनुसन्धानमै रहेको उक्त घटनाको खबरले फिनल्यान्डको नेपाली समुदायमा समेत सुरक्षाको विषयमा चिन्ता बढाएको थियो।

नम्बर आठ (8): फिनल्यान्डमा पढ्नेहरूलाई अनुरोध: पढाई नछोड्नुहोस्, नियमहरू राम्ररी बुझ्नुहोस्

हेलसिन्कीका नगर परिषद् सदस्य कृष्ण रेग्मीले लेखेको यो विश्लेषणात्म लेखमा फिनल्यान्डमा अध्ययनरत विद्यार्थीहरूलाई आफ्नो पढाइ अधुरो नछोड्न र सबै नियमकानुनहरू राम्ररी बुझ्न आग्रह गरिएको थियो। धेरैले सेयर गरेर पढेको यो लेखले विद्यार्थी भिसा र रेसिडेन्स परमिटका समस्याहरूलाई पनि सम्बोधन गरेको थियो।

नम्बर सात (7): कायानीमा ठगी र श्रम शोषणको शिकार बनेका नेपालीको समाचार

गत नोभेम्बर महिनामा नेपालीलाइनेनले ‘ब्रेक’ गरेको यो समाचार फिनल्यान्डको कायानीमा चार दर्जन भन्दा धेरै नेपालीहरूलाई काम गर्ने भनेर ल्याएर अलपत्र पारिएको विषयका बारेमा थियो। नेपालीलाइनेनले यो समाचार ‘ब्रेक’ गरेको करिब दुई साता पछि मुलधारका फिनिस मिडियाले पनि फिनल्यान्डकै इतिहासको सबैभन्दा ठूलो मानव तस्करीको केस हुनसक्ने भन्दै उक्त समाचारलाई प्राथमिकताका साथ लेखेका थिए।

कायानीका केही पीडितहरू अहिले पनि नेपालीलाइनेनको सम्पर्कमा छन् र धेरैको रेसिडेन्ट परमिट नविकरण भएपछि काम खोजिरहेका छन्।

नम्बर छ (6): फिनल्यान्डमा गम्भीर अपराधको आरोपमा एक नेपाली पक्राउ परेको समाचार

फिनल्यान्डमा गम्भीर अपराधको आरोपमा एक नेपाली पक्राउ परेको समाचारले फिनल्यान्डको नेपाली समुदायमा पनि ठूलो चर्चा पायो। यो समाचार माथि उल्लेख गरिएको कायानी ‘केस’सँगै सम्बन्धित थियो। नेपालीलाइनेनले प्राप्त गरेको सुचना अनुसार उक्त केसमा कम्तिमा दुईजना नेपाली पक्राउ परेका थिए भने पक्राउ पर्ने अन्य देशका नागरिक पनि थिए।

नम्बर पाँच (5): हेलसिन्कीमा नेपाली व्यापारीको रेस्टुरेन्टबाट हजारौं युरो चोरी भएको समाचार

फिनल्यान्डको हेलसिन्कीस्थित एक नेपाली व्यापारीको रेस्टुरेन्टबाट उनकै फिनिश म्यानेजरले हजारौं युरो चोरी गरेको र अदालतले उनलाई निलम्बित जेल सजाय सुनाएको समाचार नेपालीलाइनेनमा गतवर्ष धेरै पढिएका समाचारमध्ये पाँचौ स्थानमा परेको छ।

नम्बर चार (4): भद्रकाली कन्सल्टेन्सी विरुद्ध गम्भीर आरोप र विद्यार्थीहरूले शिक्षामन्त्री समक्ष उजुरी दिएको समाचार

नेपाली विद्यार्थीहरू फिनल्यान्ड पठाउने काठमाडौँको भद्रकाली कन्सल्टेन्सी विरुद्ध विद्यार्थीहरूले गम्भीर आरोप लगाउँदै नेपालका शिक्षा मन्त्री डा. महाविर पुन समक्ष उजुरी दर्ता गराएको समाचार नेपालीलाइनेनले ब्रेक गरेको थियो। उक्त समाचार नेपालमा पनि धेरै पढिएको थियो।

सो समाचार नेपालीलाइनेनको टिकटकमा पनि करिब २२ हजारले पढेका थिए भने करिब ३०० जनाले सेयर गरेका थिए।

नम्बर तीन (3): फिनल्यान्डका सार्वजनिक बारीबाट नेपालीहरूले धेरै केराउ टिपेको आरोप बारेको समाचार

फिनल्यान्डमा ‘प्रत्येक व्यक्तिको अधिकार’ अन्तर्गत सार्वजनिक बारीबाट केराउ लगायतका उब्जनी टिप्न पाउने भएपनि केही नेपालीहरूले अत्यधिक मात्रामा केराउ टिपेको र अरूलाई समेत नछाडेको भन्दै नेपालीलाइनेनलाई पटक-पटक सम्पर्क गरि फोटो सहित जानकारि दिइएको थियो। त्यसरी जानकारी दिने नेपालीहरू नै थिए। नेपालीलाइनेनले उक्त विषयमा लेखेको समाचार व्यापक रुपमा सेयर समेत गरिएको थियो। टिकटकमा समेत उक्त समाचार १ लाख १५ हजार पटक हेरिएको थियो भने एक हजार दस जनाले सेयर गरेका थिए।

उक्त समाचारका बारेमा नेपालीलाइनेनको आलोचना पनि भएको थियो। नेपालीले मात्र नटिपेर अरूले पनि टिपेको र सामान्य विषयलाई ठूलो बनाएको भन्दै केही पाठकले आक्रोश पोखेका थिए। आवश्यक विषयमा जानकारी गराएर सचेत बनाएको भन्दै धन्यवाद दिने पनि थिए।

नम्बर दुई (2): करिब ३० लाख रुपैयाँ खर्चेर फिनल्यान्ड आएकी नेपाली महिलाको कहालीलाग्दो कथा

एक नेपाली महिला फिनल्यान्डमा काम गर्न आउने भनेर करिब ३० लाख रुपैयाँ खर्च गरेर आएकी थिइन्। फिनल्यान्ड आउँदा संचालकहरूले उनले काम गर्ने भनेको रेस्टुरेन्ट भने बेचिसकेका थिए। सो क्रममा उनले भोग्नुपरेको कष्टकर अनुभवबारे नेपालीलाइनेनले लेखेको समाचार पनि हाम्रो गत वर्ष धेरै पढिएको समाचार मध्ये एक थियो।

नम्बर एक (1): बक्सिङमा पाँच पटक ‘फिनिस च्याम्पियनसिप’ जितेका सन्दीप पाण्डेको प्रेरणादायी कथा

पढाइमा पनि राम्रो भएका कारण बुवाले छोरो डाक्टर बने हुन्थ्यो भन्ने चाहेका थिए। आमाचाहिँ छोरोले कतै बैङ्कमा राम्रो काम गरोस् भन्ने चाहन्थिन्। छोरोले बक्सिङ सुरु गर्दा आमा चाहिँ स्तब्ध नै बनेकी थिइन्। हो, सन् २०२५ मा नेपालीलाइनेनमा सबैभन्दा धेरै पढिएको समाचार नेपाली युवा सन्दीप पान्डेले लगातार पाचौँ पटक फिनल्यान्डको राष्ट्रिय बक्सिङ च्याम्पेनसिप जितेको समाचार थियो।

उक्त समाचार नेपालीलाइनेनमा प्रकाशित भएपछि पाण्डेलाई फिनल्यान्डको नेपाली समाजले राम्रोसँग त चिन्यो नै, उनका अनुसार आफ्नै मान्छेले उनलाई हेर्ने नजर पनि परिवर्तन भयो। सोही समाचारको प्रभावकै कारण पाण्डे अहिले फिनल्यान्डका विभिन्न नेपाली संस्थासँग जोडिएका छन् र सहकार्यको तयारी गरिरहेका छन्।