नेपाल बन्यो फिनल्यान्डमा सबैभन्दा धेरै विद्यार्थी पठाउने देश

फिनिस अध्यागमनको पछिल्लो तथ्याङ्क अनुसार सन् २०२५ को पहिलो त्रैमासिकमा फिनल्यान्डका लागि पहिलो पटक विद्यार्थी आवासीय अनुमति अर्थात् रेजिडेन्ट परमिट प्राप्त गर्नेमा नेपाली विद्यार्थीहरू शीर्ष स्थानमा पुगेका छन्। सो अवधिमा विद्यार्थी श्रेणीमा ३६७ नेपालीले सकारात्मक निर्णय पाएका थिए जुन सबैभन्दा उच्च हो। २६ जना नेपाली विद्यार्थीको भने आवेदन अस्वीकृत भएको फिनिस अध्यागमनको तथ्याङ्कमा उल्लेख छ।

पहिलो विद्यार्थी आवासीय अनुमति प्राप्त गर्नेमा नेपालीहरूले कुल अनुमतिमध्ये १८.५ प्रतिशत हिस्सा ओगटेका छन्। नेपालपछि क्रमशः बङ्गलादेश (२६२), भारत (२१४) र श्रीलङ्का (१९२) का विद्यार्थीहरू रहेका छन्। तथ्याङ्कले बङ्गलादेशी र भारतीय विद्यार्थीहरूको भिसा अस्वीकृत दर तुलनात्मक रूपमा उच्च (भारतको २२%, बंगलादेश १६%) रहेको देखाउँदा नेपाली विद्यार्थीहरूको अस्वीकृत दर भने कम (६%) रहेको देखाएको छ।

समग्रमा फिनल्यान्डमा आप्रवासी पठाउने देशहरूको गणनामा नेपाल पाँचौँ स्थानमा रहेको छ। यो सूचीको पहिलो स्थानमा भारत, दोस्रोमा फिलिपिन्स, तेस्रोमा श्रीलङ्का र चौथोमा बङ्गलादेश रहेका छन्। नेपालपछि क्रमशः भियतनाम, पाकिस्तान र चीन छन्। यो तथ्याङ्कले फिनल्यान्ड एसियाली मुलुकका नागरिकहरूका लागि आकर्षक गन्तव्य बन्दै गएको स्पष्ट पार्छ।

समग्रमा फिनल्याण्डमा आप्रवासी पठाउने देशहरूमध्ये नेपाल पाँचौं स्थानमा रहेको छ।

उक्त अवधिमा कुल ९०५ नेपालीले विभिन्न उद्देश्यका लागि आवासीय अनुमतिका लागि आवेदन दिएका थिए, जसमध्ये ८४३ जनाले अनुमति प्राप्त गरे भने ५४ जनाका आवेदन अस्वीकृत भएका थिए। नेपालीहरूमध्ये पारिवारिक पुनर्मिलनका आधारमा ४११ जनाले आवासीय अनुमति पाएका थिए। त्यस्तै कामको आधारमा ६५ जनालाई अनुमति दिइएको थियो।

तथ्याङ्कले विकसित देशहरूबाट पनि मानिसहरू फिनल्याण्ड आइरहेको देखाएको छ। सन् २०२५ को पहिलो त्रैमासिकमा विकसित देशहरूमध्ये सबैभन्दा बढी आवासीय अनुमति अमेरिकी नागरिकहरूलाई (२४० स्वीकृत, २९ अस्वीकृत) प्रदान गरिएको थियो। त्यसपछि क्रमशः बेलायत (१६८ स्वीकृत, १० अस्वीकृत), जापान (१५० स्वीकृत, ४ अस्वीकृत) र अष्ट्रेलिया (५८ स्वीकृत, ४ अस्वीकृत) का नागरिकहरूले अनुमति पाएका थिए।