📺 नेपालीलाइनेनका भिडियोहरू अब YouTube मा हेर्नुहोस्।
▶️ Let's Go.संक्षेपमा.
- रिक्का पुर्राले फिन्स पार्टीको अध्यक्ष पदमा पुनः जित हासिल गरिन्।
- उनले आप्रवासनलाई फिनल्यान्डको कल्याणकारी राज्य प्रणालीका लागि खतराको रूपमा चित्रण गरिन्।
- फिन्स पार्टीले देशलाई बचाउने र एक प्रमुख शक्ति बन्ने पुर्राको दाबी।
फिनल्यान्डकी अर्थमन्त्री समेत रहेकी रिक्का पुर्रा शनिबार सम्पन्न पार्टीको चुनावमा प्रभावशाली जित निकाल्दै फिन्स पार्टी अर्थात् Perussuomalaiset को अध्यक्ष पदमा पुनः निर्वाचित भएकी छिन्। उनले प्रतिद्वन्द्वी आर्टो लुक्कानेनलाई स्पष्ट मतान्तरले पराजित गरिन्। पुर्राले ७३० मत प्राप्त गर्दा लुक्कानेनले १२६ मत पाए। कुल ८७६ मत खसेकोमा ७९ मत बदर भएका थिए भने २० मत खाली थिए।
आफ्नो पुन:निर्वाचनपछि बोल्दै पुर्राले पार्टीको भविष्यप्रति आत्मविश्वास व्यक्त गरिन्। “हामी एक प्रमुख शक्ति बन्नेछौं, र हामी यो देशलाई बचाउनेछौं,” उनले थपिन्। पार्टीको समर्थनमा आएको कमीबारे सोधिएको प्रश्नमा उनले अर्थतन्त्रको कमजोर अवस्थालाई आंशिक रूपमा जिम्मेवार ठह्याइन्।
लाहतीमा भएको पार्टी भेलामा आफ्नो उद्घाटन मन्तव्य दिँदै पुर्राले फिनिस पहिचानमाथि हमला भइरहेको बताएकी थिइन। उनले आप्रवासन प्रति कडा प्रहार गर्न लामो समय खर्च गरेकि थिइन्।
पुर्रा आप्रवासीहरू प्रति निकै अनुदार छिन्। उनले निरन्तर रूपमा सामाजिक सञ्जालमा पोस्ट गर्दै आप्रवासनको कडा आलोचना र फिनल्यान्डमा बस्ने आप्रवासीहरू प्रति अनुदार विचार व्यक्त गर्ने गरेकी छिन्। वर्तमान सरकारले आप्रवासनमा गरेको कडाइ मूलतः उनकै नेतृत्वमा उनकै पार्टीका नेताहरूबाट भइरहेको हो। सरकारमा रहेको फिन्स पार्टीको समर्थन भने फिनल्यान्डमा घट्दै गएको विभिन्न मत सर्वेक्षणले देखाएका छन्।
“विकासोन्मुख देशहरूबाट भइरहेको ठूलो संख्याको आप्रवासन, साथै सार्वजनिक सेवा र सामाजिक तथा स्वास्थ्य सेवा प्रणालीमाथि बोझ थप्ने आप्रवासनले कल्याणकारी राज्यको पतन गराउनेछ,” उनले लाहतीमा पार्टी प्रतिनिधिलाई भनिन्।
पुर्रा आप्रवासीहरू प्रति निकै अनुदार छिन्।
उता स्वीडिस पिपुल्स पार्टी (एसपीपी) को चुनाव भइरहेको भासामा एसपीपीका अध्यक्ष तथा फिनल्यान्डका शिक्षा मन्त्री एन्डर्स एडलरक्रुट्जले भने आप्रवासनको सरलीकृत भाष्यलाई अस्वीकार गरे।
“फिनल्याण्डको समस्या धेरै आप्रवासी हुनु होइन। यहाँ धेरै मानिस आउन चाहनु पनि होइन। हामीले धेरैलाई स्वास्थ्य सेवा उपलब्ध गराइरहेका छौं भन्ने पनि होइन। के तपाईंलाई थाहा छ फिनल्याण्डको वास्तविक समस्या के हो? हाम्रो समस्या यो हो कि हामीसँग धेरै जातिवादीहरू छन्,” उनले भने।
नेपालीलाइनेनबाट थप:
निर्मल पुर्जाको मृत्युपछि पूर्व मिस फिनल्यान्डलाई 'हेट मेसेज'को वर्षा, ज्यान मार्ने धम्की
एसडिपीको नयाँ 'आप्रवासी नीति'ले फिनिस राजनीति तरङ्गितः के छ आप्रवासी नेताको मत?
हेलसिन्की-तालिन सुरुङ रेलमार्गको चर्चा फेरी सुरू, निर्माण सम्पन्न भए हुनेछ 'गेम चेन्जर'
समुद्रमा तैरिने सहर: यस्ता छन् फिनल्यान्डमा बनेका संसारकै सबैभन्दा ठुला पानीजहाज
प्रिय पाठक, हाम्रो 'सहयोगी सदस्य' बनी हाम्रो कामलाई सघाउनुहोस्। साथै हाम्रा सबै प्रिमियम सामाग्री पढ्नुहोस्।
