.संक्षेपमा.
- योगेन्द्र सङ्ग्रौलाको अध्यक्षतामा गैरआवासीय नेपाली संघ फिनल्यान्डको नयाँ कार्यसमिति गठन हुने।
- माग गरिएका पदहरूमा आवश्यक संख्यामा मात्र उम्मेदवारी परेकाले निर्वाचनको आवश्यकता नपर्ने।
- अन्तर्राष्ट्रिय समन्वय परिषद् (आईसीसी) सदस्य पदमा भने कसैको पनि उम्मेदवारी नपरेकाले पद रिक्त।
गैर आवासीय नेपाली सङ्घ (एनआरएनए) राष्ट्रिय समन्वय परिषद् फिनल्यान्डको २०२५−२०२७ कार्यकालका लागि नयाँ कार्यसमिति निर्विरोध निर्वाचित हुने भएको छ। निर्वाचन समितिले मङ्गलवार सार्वजनिक गरेको उम्मेदवारहरूको प्रारम्भिक सूची अनुसार अध्यक्ष पदमा योगेन्द्र सङ्ग्रौलाको मात्र एकल उम्मेदवारी परेको छ।
माग गरिएका पदभन्दा बढी उम्मेदवारी नपरेकाले निर्वाचनको आवश्यकता नदेखिएको निर्वाचन समितिका संयोजक शम्भु प्रसाद साहले नेपालीलाइनेनलाई बताए।
“यसको विधिवत् घोषणा त ३१ अगस्टको साधारण सभाबाट हुन्छ, तर अबको समिति यही हो। चुनाव गर्नुपर्ने आवश्यकता रहेन।” शाहले भने।
यसअघि वर्तमान अध्यक्ष लव उपाध्यायले नेपालीलाइनेनसंग कुरा गर्दै अध्यक्षको रूपमा दोहोरिने आफ्नो इच्छा नरहेको बताएका थिए।
“मेरो कार्यसमितिमा तीन कार्यकाल भयो। अध्यक्षको रूपमा पनि एक कार्यकाल गरियो।” उनले भनेका थिए। “अब म चाहिँ दोहोरिन्न, तर अहिलेको समितिका धेरै साथीहरूको दोहोरिने इच्छा छ।”
अहिलेका उपाध्यक्ष मध्येका एक र भावी अध्यक्ष हुने निश्चित भएका योगेन्द्र सङ्ग्रौलाले भने निर्वाचन प्रक्रिया सुरु नहुन्जेल आफ्नो अध्यक्षको उम्मेदवारीबारे केही नबोल्ने बताएका थिए।
अन्य मुलुकहरूमा एनआरएनए कार्यसमिति चयन गर्दा घम्साघम्सी हुने गरे पनि फिनल्यान्डमा भने सामान्यतया: सर्वसम्मतिमै नेतृत्व चयन हुने गरेको छ।
को-को छन् नयाँ समितिमा?
निर्वाचन समितिले प्रकाशित गरेको सूचना अनुसार २०२५−२०२७ कार्यकालका लागि निम्न उम्मेदवारीहरू परेका थिए। निर्वाचन नहुने भएपछि अबको कार्यसमिति यही नै हुनेछ।
- अध्यक्ष: योगेन्द्र संग्रौला
- उपाध्यक्ष: विष्णु अर्याल, प्रतिष्ठा मिश्र, र तारा प्रसाद सापकोटा
- महासचिव: पारस शर्मा
- सचिव: मनोज अर्याल
- कोषाध्यक्ष: शिला घिमिरे
- महिला प्रतिनिधि: वर्षा खनाल
- युवा प्रतिनिधि: अशिम घिमिरे
पदाधिकारीमा रहेकामध्ये उपाध्यक्षहरू प्रतिष्ठा मिश्र र विष्णु अर्याल, महासचिव पारस शर्मा, र कोषाध्यक्ष शिला घिमिरे नयाँ नामहरू हुन्। मिश्र, अर्याल, र शर्मा वर्तमान समितिमा सदस्यको रूपमा छन्।
महिला प्रतिनिधि वर्षा खनाल र युवा प्रतिनिधि अशिम घिमिरे पनि उक्त पदमा नयाँ हुन्। घिमिरे भने वर्तमान समितिमा सदस्यको रूपमा छन्।
उपाध्यक्ष तारा प्रसाद सापकोटा अहिले पनि उपाध्यक्ष छन् भने मनोज अर्याल पनि अहिलेकै सचिव हुन्। वर्तमान समितिका महासचिव सौरभ लामिछाने र उपाध्यक्ष बिनिता लामिछानेले कुनै पदमा उम्मेदवारी दिएका छैनन्। अर्थात् वर्तमान अध्यक्ष उपाध्यायजस्तै उनीहरू पनि एनआरएनए समितिबाट बाहिरिएका छन्।
१२ जना कार्यसमिति सदस्यहरूमा कपिल पाण्डे (हेलसिन्की), लेखनाथ भण्डारी (खुला), अनन्त सापकोटा (कुओपिओ), भगवान यादव (खुला), सुदर्शन भण्डारी (हेलसिन्की), वरुण खनाल (हेलसिन्की), दीपक क्षेत्री (हेलसिन्की), गोविन्द प्रसाद अर्याल (हेलसिन्की), विकेश श्रेष्ठ (खुला), पवन पाण्डे (हेलसिन्की), विनोद खरेल (ओउलु), र कविता अधिकारी (हेलसिन्की) को उम्मेदवारी परेको छ।
निर्वाचन समितिले उम्मेदवारहरूको सूचीउपर दाबी-विरोधका लागि आह्वान गरेको छ, तर त्यस्तो हुने सम्भावना निकै कम रहेको विश्वसनीय स्रोतले नेपालीलाइनेनलाई बतायो।
कुनै पनि उम्मेदवार उपर प्रमाणसहितको दाबी-विरोध भएमा १४ अगस्ट २०२५ को साँझ ५ बजेभित्र समितिको इमेलमा पठाउन सकिनेछ। साथै कुनै उम्मेदवारले आफ्नो उम्मेदवारी फिर्ता लिन चाहेमा सोही समयसीमाभित्र निवेदन दिन सक्नेछन्।
तोकिएको समयभित्र कुनै दाबी-विरोध वा उम्मेदवारी फिर्ता नभएमा यही सूचीलाई अन्तिम मानी नयाँ कार्यसमिति निर्विरोध निर्वाचित भएको घोषणा गरिनेछ।
अन्तर्राष्ट्रिय समन्वय परिषद् (आईसीसी) सदस्य पदका लागि भने कसैको पनि उम्मेदवारी परेको छैन
अन्तर्राष्ट्रिय समन्वय परिषद् (आईसीसी) सदस्य पदका लागि भने कसैको पनि उम्मेदवारी परेको छैन, जसका कारण उक्त पद हाललाई रिक्त रहेको छ।
शम्भु प्रसाद साहको संयोजकत्वमा गठित निर्वाचन समितिमा मुक्ति नारायण पौडेल, शैलु भट्टराई र सचिन्द्र रिमाल सदस्य रहेका छन्।
