फिनल्यान्डको कालायोकीस्थित Hiekkasärkät समुद्री तटमा गत शुक्रबार भएको एक हृदयविदारक दुर्घटनामा डुबेर बेपत्ता भएका तीनै किशोरको मृत्यु भएको छ।
प्रहरीले शनिबार राति तेस्रो शव फेला पारेसँगै यो दुःखद घटनाको पुष्टि गरेको हो। मृत्यु हुने सबै किशोर फिनल्यान्डमा बसोबास गर्दै आएका विदेशी मूलका भएको प्रहरीले जनाएको छ।
ओउलु प्रहरी विभागका अनुसार शुक्रबार दिउँसो तीन किशोर बल खेल्दै पौडी खेल्ने क्रममा किनारबाट करिब १०० मिटर टाढा पुगेका थिए। अचानक पानीको गहिराइ बढेको ठाउँमा पुगेपछि उनीहरु डुब्न थालेको अनुमान गरिएको छ।
प्रत्यक्षदर्शीहरूले उनीहरू मद्दतका लागि अंग्रेजीमा चिच्याएको सुनेका थिए र केहीले स्ट्यान्ड-अप प्याडलबोर्डको सहायताले उद्धारको प्रयास गरे पनि सफल हुन भने सकेनन्।
शुक्रबार साँझ दुई जना किशोरको शव फेला परेको थियो। हराइरहेका तेस्रो किशोरको खोजी कार्य शनिबार पनि जारी राखिएको थियो। अन्ततः शनिबार राति करिब ११ बजे स्वयंसेवक गोताखोरहरूको सहयोगमा तेस्रो शव पनि फेला परेको थियो। मृतकहरू सन् २००८ र २००९ मा जन्मेका थिए।
प्रहरीले घटनामा कुनै आपराधिक संलग्नता नरहेको र यसलाई दुःखद दुर्घटनाको रूपमा अनुसन्धान गरिरहेको बताएको छ।
अनुसन्धानका प्रमुख यान सोरमुनेनले समुद्री तटको विशाल क्षेत्र, पानीमुनिका अवरोधहरू र समुद्री छालका कारण खोजी कार्य चुनौतीपूर्ण रहेको बताए।
Hiekkasärkätवसमुद्री तट बालुवाको ढिस्को र अचानक आउने गहिरो पानीका कारण खतरनाक मानिन्छ।
यो दुःखद घटनापछि स्थानीय समुदाय र पर्यटकहरूले घटनास्थलमा मैनबत्ती बालेर र फूल चढाएर मृतकहरूप्रति श्रद्धाञ्जली अर्पण गरेका छन्। कालायोकी शहर र स्थानीय निकायहरूले प्रभावित परिवार तथा समुदायलाई मनोवैज्ञानिक सहयोग उपलब्ध गराइरहेका छन्।
