📺 नेपालीलाइनेनका भिडियोहरू अब YouTube मा हेर्नुहोस्।
▶️ Let's Go.संक्षेपमा.
- १६ वर्षीय किशोरले सजिलो पैसाको लागि नक्कली गाँजा बेचे।
- ठगिएका क्रेताले बदला लिन किशोरलाई अपहरण गरी घण्टौंसम्म यातना दिए, बीस हजार युरो फिरौती मागे।
- प्रहरीले युवाहरूलाई लागुऔषधको कारोबारबाट टाढा रहन चेतावनी दियो।
हेलसिन्कीमा सजिलो पैसा कमाउने लोभमा एक १६ वर्षीय किशोरले नक्कली गाँजा बेच्दा अपहरणमा पर्नुका साथै घण्टौंसम्मको मानसिक र शारीरिक यातना भोग्नुपरेको छ।
पूर्वी उसिमा प्रहरीका अनुसार नक्कली गाँजा किनेर ठगिएका एक व्यक्तिले आफ्ना साथीहरूसँग मिलेर ती किशोरलाई अपहरण गरी फिरौतीसमेत मागेका थिए।
घटनाको सुरुवात जुलाई ९ मा भएको थियो जब १६ वर्षीय किशोरले हेलसिन्की रेलवे स्टेसन नजिक एक अपरिचित व्यक्तिलाई नक्कली गाँजा बेचेका थिए।
अनुसन्धान प्रमुख डिटेक्टिभ सुपरिटेन्डेन्ट साम्प्सा औकियोका अनुसार “स्न्यापच्याटमा अर्कै व्यक्तिले ती किशोरको तर्फबाट बिक्रीको सम्झौता मिलाएको थिए र बदलामा बिक्रीबाट प्राप्त हुने केही सय युरो दिने वाचा गरेका थिए।”
तर खरिदकर्ताले आफूले किनेको सामान नक्कली भएको थाहा पाएपछि उनी आक्रोशित भए र बदला लिने योजना बनाए। उनले फरक नामबाट अर्को भेटघाटको समय तय गरे।
कसरी भयो अपहरण?
जुलाई १४ मा ती १६ वर्षीय किशोर नयाँ बिक्रीको लागि भान्ता पुग्दा उनले पुरानै व्यक्तिलाई देखेर भाग्ने प्रयास गरे। तर क्रेता र उनका दुई साथीले किशोरलाई समातेर बलपूर्वक कारमा राखे।
प्रहरीका अनुसार त्यसपछि किशोरलाई राजधानी क्षेत्र वरिपरि करिब दुई घण्टासम्म कारमा घुमाइयो। उनलाई मौखिक रूपमा हिंसा र यातना दिने धम्की दिइयो। चक्कु र बन्दुकको कुरा गरेर उनको डर अझ बढाइयो।
अपहरणकारीहरूले नक्कली गाँजा बेचेको बदलामा किशोरसँग २०,००० युरो माग गरे। रकम प्रत्येक दश दिनमा ५,००० युरोका दरले तिर्नुपर्ने र नतिरेमा ज्यान मार्ने धम्की दिइयो।
उनीहरूले किशोरलाई उक्त ऋण स्वीकार गर्न लगाएर भिडियो पनि बनाए, जसमा उनको र परिवारका सदस्यहरूको व्यक्तिगत विवरणसमेत खुलाउन लगाइएको थियो।
केही घण्टापछि अपहरणकारीहरूले किशोरलाई उनको फोन फिर्ता दिएर छोडिदिए। घर पुगेर किशोरले आफ्ना अभिभावकलाई घटनाबारे जानकारी गराएपछि प्रहरीलाई खबर गरिएको थियो।
प्रहरीले तुरुन्तै अनुसन्धान अगाडि बढायो र घटनामा संलग्न सबैलाई पहिचान गर्यो।
प्रहरीले करिब ३० वर्षीय मुख्य अभियुक्तलाई पक्राउ गरेको छ भने अन्य दुई जनालाई यात्रा प्रतिबन्धमा राखेको छ। प्रहरीले यस घटनालाई डकैतीको प्रयास, ठगी, गम्भीर स्वतन्त्रता हनन, र लागुऔषध अपराध जस्ता विभिन्न शीर्षकमा अनुसन्धान गरिरहेको छ।
नक्कली गाँजा बेच्ने किशोर पनि यस घटनामा एक शंकास्पद व्यक्तिको रूपमा छन्।
प्रहरीले युवाहरूलाई सजिलो पैसाको लोभमा यस्ता कुनै पनि गतिविधिमा संलग्न नहुन चेतावनी दिएको छ।
नेपालीलाइनेनबाट थप:
निर्मल पुर्जाको मृत्युपछि पूर्व मिस फिनल्यान्डलाई 'हेट मेसेज'को वर्षा, ज्यान मार्ने धम्की
एसडिपीको नयाँ 'आप्रवासी नीति'ले फिनिस राजनीति तरङ्गितः के छ आप्रवासी नेताको मत?
हेलसिन्की-तालिन सुरुङ रेलमार्गको चर्चा फेरी सुरू, निर्माण सम्पन्न भए हुनेछ 'गेम चेन्जर'
समुद्रमा तैरिने सहर: यस्ता छन् फिनल्यान्डमा बनेका संसारकै सबैभन्दा ठुला पानीजहाज
प्रिय पाठक, हाम्रो 'सहयोगी सदस्य' बनी हाम्रो कामलाई सघाउनुहोस्। साथै हाम्रा सबै प्रिमियम सामाग्री पढ्नुहोस्।
