फिनल्यान्डमा नयाँ व्यवसाय दर्ता ह्वात्तै बढ्यो, कारण छ यस्तो

फिनल्यान्डमा यो वर्षको दोस्रो त्रैमासिकमा नयाँ व्यवसाय दर्ता गर्नेको संख्यामा २० प्रतिशतले वृद्धि भएको छ। फिनल्यान्डको तथ्याङ्क विभागका अनुसार यो वृद्धिको मुख्य कारण फुड डेलिभरी गर्ने कूरियरहरूले आफूलाई उद्यमीका रूपमा दर्ता गराउनु हो।

विशेषगरी खाना डेलिभरी गर्ने व्यक्तिहरूले कम्पनीमा कामदारको रूपमा नभई आफ्नै व्यवसाय (Y-tunnus) दर्ता गराइरहेका कारण यो वृद्धि देखिएको जनाइएको छ।

फिनल्यान्डमा दस हजार भन्दा धेरै खाना डेलिभरी गर्ने राइडरहरू छन्, र ती मध्ये अधिकांश आप्रवासी मूलका छन्।

यो परिवर्तनको सुरुवात गत मे महिनामा फिनल्यान्डको सर्वोच्च प्रशासनिक अदालतले ‘वोल्ट’ (Wolt) का कूरियरहरूलाई कर्मचारी मान्नुपर्ने फैसला गरेपछि भएको हो।

यसका साथै युरोपेली संघ (EU) मा पारित भएको नयाँ ‘प्लेटफर्म वर्क डाइरेक्टिभ’ले पनि यस्ता कम्पनीहरूलाई आफ्ना कूरियरहरूलाई कर्मचारी मान्न दबाब दिएको छ।

अदालतको फैसला र नयाँ नियमका कारण ‘वोल्ट’ र ‘फुडोरा’ जस्ता कम्पनीहरूले अब आफ्ना कूरियरहरूसँग ‘Y-tunnus’ (बिजनेस आइडी) हुनुपर्ने नियम लगाउन थालेका छन्। यसले गर्दा कूरियरहरू धमाधम आफ्नै व्यवसाय दर्ता गर्न बाध्य भएका हुन्।

साना व्यवसायीहरूको छाता संस्थाकी लिसा हानेनका अनुसार कूरियरहरू दुई मुख्य कारणले व्यवसाय दर्ता गरिरहेका छन्। पहिलो, यसरी व्यवसाय दर्ता गर्ने धेरैजना उद्यमीको आवासीय अनुमति (entrepreneur’s residence permit) मा फिनल्यान्डमा बसिरहेका छन् र आफ्नो आम्दानी सुरक्षित छ भनी प्रमाणित गर्न उनीहरूलाई व्यवसाय दर्ता गर्नु आवश्यक छ। दोस्रो, कम्पनीहरूले नै ‘Y-tunnus’ अनिवार्य गरेपछि उनीहरूसँग अर्को विकल्प छैन।

फिनल्यान्डमा पछिल्लो समय स्थायी रोजगारीको सट्टा स्वरोजगार र साना उद्यमीहरूको संख्या बढिरहेको छ। विज्ञहरूका अनुसार आर्थिक अवस्था कमजोर हुँदा मानिसहरूका लागि बेरोजगारी वा कम आम्दानी हुने स्वरोजगारबाहेक अन्य विकल्प कम हुन्छन्।

सन् २०२५ को अप्रिलदेखि जुनसम्ममा कुल १६,९५५ नयाँ व्यवसाय दर्ता भएका थिए। तीमध्ये ११,५८० एकल उद्यमी (toiminimiyrittäjä) थिए, जुन फुड डेलिभरी गर्नेहरूले सबैभन्दा बढी रोज्ने व्यवसाय मोडेल हो।