.संक्षेपमा.
- आधाभन्दा बढी फिनिसहरू भाषा सिक्दै गरेका स्वास्थ्यकर्मीबाट सेवा लिन राजी।
- सरकारी कार्यालयमा भने अधिकांश फिनिसहरू आफ्नै मातृभाषामा सेवा चाहन्छन्।
- फिनल्यान्ड आउने विदेशीले फिनिस भाषा सिकून् भन्ने धेरैको चाहाना।
फिनल्यान्डमा बस्ने आधाभन्दा बढी मानिसहरू (५६ प्रतिशत) फिनिस वा स्विडिस भाषा पूर्ण रूपमा नजानिसकेका डाक्टर वा नर्सबाट स्वास्थ्य सेवा लिन तैयार रहेको एक नयाँ अध्ययनले देखाएको छ।
यो नतिजाले फिनल्यान्डमा स्वास्थ्य सेवा क्षेत्रमा काम गर्न चाहने वा कार्यरत नेपालीहरूका लागि पनि एक सकारात्मक सन्देश दिएको छ।
E2 अनुसन्धानले गरेको सर्वेक्षण अनुसार स्वास्थ्य सेवामा भाषा सिक्दै गरेकालाई स्वीकार्ने प्रवृत्ति बढ्दो छ। तर सरकारी तथा आधिकारिक सेवाहरूमा भने फिनिसहरूको धारणा फरक पाइएको छ।
करिब ७५ प्रतिशत फिनिसहरूले सरकारी कार्यालयहरूमा भने आफ्नै मातृभाषामा सेवा पाउनुपर्नेमा जोड दिएका छन्।
“फिनल्यान्डलाई विभिन्न क्षेत्रमा दक्ष जनशक्तिको खाँचो छ। स्वास्थ्यकर्मीहरूको भाषा सिक्ने प्रक्रियालाई सकारात्मक रूपमा हेरिनु अन्तर्राष्ट्रिय नियुक्तिका लागि राम्रो समाचार हो।” फिनिस कल्चरल फाउन्डेसनकी प्रमुख कार्यकारी अधिकृत सुसाना पेटर्सन भन्छिन्।
लगभग ९३ प्रतिशत फिनिसहरू फिनल्यान्डमा बसाइँ सर्ने विदेशीहरूले फिनिस वा स्विडिस भाषा सिकून् भन्ने चाहेको पनि अध्ययनले देखाएको।
बहुमत फिनिसहरू (६८ प्रतिशत) आप्रवासीहरूलाई भाषा सिक्न मद्दत गर्न इच्छुक रहेको पनि अध्ययनले देखाएको छ।
मातृभाषालाई फिनिस पहिचानको एक महत्त्वपूर्ण हिस्सा मानिन्छ, तर बहुभाषिकता प्रति पनि खुलापन देखिन्छ। विशेष गरी युवा र ७५ वर्षभन्दा माथिका मानिसहरूमा यो सोचाइ प्रबल रहेको अध्ययनले देखाएको छ।
