फिनल्यान्डमा औषधिको चरम अभाव: ६७० भन्दा बढी औषधि पाउन मुस्किल

फिनल्यान्डमा हाल ६७० भन्दा धेरै प्रकारका औषधिहरूको आपूर्तिमा व्यापक अवरोध देखिएको छ, जसका कारण धेरै फार्मेसीहरूले सामान्य र डाक्टरको सिफारिसमा पाइने औषधिहरू समेत उपलब्ध गराउन सकेका छैनन्।

फिनिस मेडिसिन एजेन्सी (Fimea) ले शुक्रबार सार्वजनिक गरेको तथ्याङ्कले औषधि अभावको समस्या व्यापक रहेको देखाएको हो।

अभाव भएका औषधिहरूको सूचीमा सामान्य दुखाइ र ज्वरोमा प्रयोग हुने Ibutabs र Ibusal, मुटु पोल्दा खाइने Antepsin, रुघाखोकीको औषधि Nasolin, र खोकीको लागि प्रयोग हुने Codetabs जस्ता सामान्य औषधिहरू पनि समावेश छन्।

केही औषधिहरू सन् २०२५ को अन्त्य वा त्यसपछि मात्रै उपलब्ध हुने अनुमान गरिएको छ।

डाक्टरको सिफारिसमा मात्र पाइने औषधिहरूको अभावले चिन्ता/डिप्रेसन एचआईभी, क्यान्सर, उच्च रक्तचाप, दम, माइग्रेन, र छारेरोग जस्ता विभिन्न गम्भीर रोगका बिरामीहरूलाई असर पारेको छ।

हाल उपलब्ध नभएका प्रमुख औषधिहरूमा Diapam, गर्भनिरोधक चक्की Yaz, र कडा दुखाइ कम गर्ने Fentanyl जस्ता औषधिहरू छन्।

व्यापक रूपमा प्रयोग हुने दुखाइ कम गर्ने औषधि Panacod पनि सबै प्याकेज साइजमा कम्तिमा सेप्टेम्बरको अन्त्यसम्म उपलब्ध नहुने बताइएको छ।

सबैभन्दा लामो समयसम्म अभाव हुने औषधिहरूमध्ये गम्भीर एलर्जी हुँदा आपतकालीन अवस्थामा प्रयोग गरिने Emerade इन्जेक्सन सन् २०२७ को अन्त्यसम्म पूर्ण रूपमा उपलब्ध नहुने देखिएको छ।

Fimea का अनुसार अधिकांश अभावहरू अल्पकालीन प्रकृतिका छन्। तर उत्पादनमा देखिने चुनौती, कच्चा पदार्थको अभाव, वा मागमा आएको अप्रत्याशित वृद्धिका कारण केही अभाव लामो समयसम्म रहन सक्नेछ।

धेरै औषधि उत्पादकहरूले विश्व बजारलाई नै लक्षित गर्ने भएकाले अन्तर्राष्ट्रिय औषधि कारखानाहरूको क्षमतामा आएको समस्या पनि यसको प्रमुख कारण हो।

धेरैजसो औषधिका वैकल्पिक उत्पादन वा उपचार उपलब्ध भएका कारण Fimea ले बिरामीहरूलाई नआत्तिन आग्रह गरेको छ।

आफ्नो स्थानीय फार्मेसीमा कुनै औषधि उपलब्ध छ वा छैन भनी सिधै सोधपुछ गर्न सकिन्छ, वा फार्मेसीहरूको अनलाइन औषधि खोज्ने प्रणाली र युनिभर्सिटी फार्मेसी (Yliopiston Apteekki) को वेबसाइट प्रयोग गरेर पनि जानकारी लिन सकिन्छ।

कुनै औषधि नपाएमा वैकल्पिक औषधिको लागि आफ्नो डाक्टरसँग परामर्श गर्न सुझाव दिइएको छ।